AmaHubo 44 - iBhayibhili Elingcwele 1978

Ukukhululwa kwasendulo lokuhlupheka kwalesisikhathi

¹ Nkulunkulu, sizwile ngendlebe zethu, okhokho basitshelile ngezenzo owazenza ensukwini zabo, ensukwini zasendulo.

² Wababeka bona elizweni, kodwa wazixotsha izizwe ngesandla sakho; wazichitha izizwe, kodwa wabandisa bona.

³ Ngoba kabalithumbanga ilizwe ngemikhonto yabo, kabanqobanga ngamandla abo, kodwa ngesandla sakho langamandla akho, langokukhanya kobuso bakho; ngoba wawubathanda.

⁴ Wena uyiNkosi yami loNkulunkulu wami, onika uJakobe ukunqoba.

⁵ Ngawe sizakunqoba izitha zethu, langebizo lakho zizakubanyathela phansi abasivukelayo.

⁶ Ngoba kangithembeli kuwo umtshoko wami, futhi umkhonto wami kawulamandla okungisiza.

⁷ Kodwa wena usikhulule ezitheni zethu, wabachitha labo abasizondayo.

⁸ Sizincomile ngoNkulunkulu njalonjalo; sizakulibonga ibizo lakho kuze kube nininini.

⁹ Kanti ususilahlile wasiyangisa, kawusaphumi lezimpi zethu.

¹⁰ Usenze ukuba sibalekele izitha zethu; izitha zethu ziyaziphangela nje.

¹¹ Usenza sibe njengezimvu zokuhlatshwa, wasichithachitha phakathi kwezizwe.

¹² Ngoba uthengisile abantu bakho ngokuncinyane nje, ungabizi intengo enkulu ngabo.

¹³ Usenze saba lihlazo kwabakhelene lathi, inhlekisa lendumazo kwabasiphahlileyo.

¹⁴ Usenze saba yisiga phakathi kwezizwe, into yokuhlekisa phakathi kwabantu.

¹⁵ Usuku lonke ngiyadunyazwa, ngibanjwe zinhloni,

¹⁶ ngenxa yamazwi abaklolodayo labahlambazayo, langenxa yesitha lomphindiseli.

¹⁷ Konke lokhu kwehlela phezu kwethu, lanxa singakukhohlwanga wena, singasaphulanga isivumelwano sakho.

¹⁸ Inhliziyo zethu kazibuyelanga emuva, lezinyathelo zethu kaziphambukanga endleleni yakho,

¹⁹ ukuba usiphahlaze ngasendaweni yamakhanka, usambese ngomnyama omkhulu.

²⁰ Uba besilikhohliwe ibizo likaNkulunkulu wethu, loba sakhonza unkulunkulu wezizweni,

²¹ uNkulunkulu ubengayikukubona lokhu na? Ngoba uyayazi imfihlo yenhliziyo.

²² Yebo, ngenxa yakho siyabulawa usuku lonke, kuthiwa siyizimvu zokuhlatshwa.

²³ Vuka, Nkosi! Ulaleleni na? Vuka! Ungasilahli kokuphela.

²⁴ Uzifihleleni kithi na? Ukukhohlwelani ukuhlupheka kwethu lokucindezelwa kwethu na?

²⁵ Ngoba siwele phansi othulini, silala phansi sinqotshiwe.

²⁶ Vuka, uzesisiza usikhulule ngenxa yothando lwakho olungapheliyo.