AmaHubo 42 - iBhayibhili Elingcwele 1978

UGWALO LWESIBILI Umkhuleko womuntu okhatshana lakibo

¹ Njengalokhu impala inxwanele imifula yamanzi, ngokunjalo umphefumulo wami unxwanela wena, Nkulunkulu.

² Umphefumulo wami womela uNkulunkulu, uNkulunkulu ophilayo. Ngizakufika nini ngibone ubuso bukaNkulunkulu na?

³ Inyembezi zami beziyikudla kwami emini lasebusuku, lapho abantu kokuphela besithi: Ungaphi uNkulunkulu wakho na?

⁴ Ngikhumbula lezizinto ngidabuke inhliziyo, ukuthi ngangihamba lamaxuku, ngiwakhokhele odwendweni lokuya endlini kaNkulunkulu ngenhlokomo yezingoma zokubonga, ixuku eligida umkhosi.

⁵ Udaneleni mphefumulo wami na? Ukhathazekelani phakathi kwami na? Themba kuNkulunkulu, ngoba ngisezakumdumisa, umsizi wami loNkulunkulu wami.

⁶ Umphefumulo wami udanile phakathi kwami; ngakhoke ngiyakukhumbula wena lapha elizweni laseJordani lelaseHermoni lasentabeni iMizari.

⁷ Impophoma iyabiza impophoma ekuhlokomeni kweziholoba zakho; wonke amavinqo lamaza akho adlule phezu kwami.

⁸ Emini iNkosi iyangiphatha ngothando lwayo olungapheliyo; ebusuku ngiyahlabela ingoma yayo, umkhuleko wami kuNkulunkulu wokuphila kwami.

⁹ Ngithi kuNkulunkulu, idwala lami: Ungikhohlwelani na? Ngihambelani ngilila ngenxa yokucindezela kwezitha na?

¹⁰ Kuyafutha njengesilonda emzimbeni wami lapho izitha zami zingihleka, lapho zisithi kimi insuku zonke: Ungaphi uNkulunkulu wakho na?

¹¹ Udaneleni mphefumulo wami na? Ukhathazekelani phakathi kwami na? Themba kuNkulunkulu, ngoba ngisezakumdumisa futhi, umsizi wami loNkulunkulu wami.