AmaHubo 40 - iBhayibhili Elingcwele 1978

Ukubonga lomkhuleko wokucela ukukhululwa

¹ Ngayilindela iNkosi ngesineke; yangilalela yezwa ukukhala kwami.

² Yangikhupha emgodini owesabekayo, exhaphozini elibi, yabeka inyawo zami phezu kwedwala, yaqinisa izinyathelo zami.

³ Yafaka ingoma entsha emlonyeni wami, ingoma yokubonga uNkulunkulu wami. Abanengi bazakukubona besabe, bayithembe iNkosi.

⁴ Ubusisiwe umuntu oyithembayo iNkosi, ongaphendukeli kwabazigqajayo, kulabo abaduhela kubonkulunkulu bamanga.

⁵ Nkosi, Nkulunkulu wami, wena wenzile izinto ezinkulu, lemicabango yakho mihle ngathi; kakho ongafaniswa lawe. Uba ngizilandisa ngizitsho, zinengi zingeke zibalwe.

⁶ Umhlatshelo lomnikelo kawuwudingi, umnikelo wokutshiswa lomnikelo wesono kawuwubizi; kodwa unginikile indlebe evulekileyo.

⁷ Ngasengisithi: Khangela, ngiyeza; emqulwini wencwadi kulotshelwe mina imithetho yakho;

⁸ ngiyathanda ukwenza intando yakho, Nkulunkulu wami, umlayo wakho usenhliziyweni yami.

⁹ Ngitshumayele ebandleni elikhulu indaba ezinhle zokukhululwa; kangiyikuwuvala umlomo wami njengoba usazi, wena Nkosi.

¹⁰ Ukusiza kwakho kangikufihlanga enhliziyweni yami; ngikhulumile ngobuqotho bakho langokukhulula kwakho; kangilufihlanga uthando lwakho olungapheliyo kanye lobuqotho bakho ebandleni elikhulu.

¹¹ Wena Nkosi, ungangigodleli isihawu sakho; uthando lwakho olungapheliyo lobuqotho bakho kakungilondoloze njalonjalo.

¹² Ngoba ububi obunengi bungihanqile, leziphambeko zami zingificile, kangisaboni; zinengi ukwedlula inwele zekhanda lami; ngiphelelwe yisibindi.

¹³ Vuma, Nkosi, ukungikhulula. Nkosi, phangisa ungisize.

¹⁴ Kabayangeke babe lenhloni bonke abafuna ukungibulala; kabaxotshwe bayangiswe abafuna ukungilimaza.

¹⁵ Kabatshaqeke ngenxa yehlazo labo abathi kimi: Hiya belo!

¹⁶ Kodwa kabathabe bajabule bonke abakudingayo wena; abathanda ukukhulula kwakho kabatsho njalo bathi: Yinkulu iNkosi!

¹⁷ Loba mina ngiyisihlupheki ngiswela, iNkosi iyanginanzelela; wena ungumsizi wami lomkhululi wami; ungalibali, Nkulunkulu wami.