AmaHubo 39 - iBhayibhili Elingcwele 1978

Ukuphila komuntu kuyadlula

¹ Ngathi: Ngizakuqaphelisa izindlela zami, ukuba ngingoni ngolimi lwami; ngizakunqanda umlomo wami lapho omubi ekhona phambi kwami.

² Ngathula ngathi zwi; ngathula, kakwaze kwasiza lutho; ukuhlupheka kwami kwakhula,

³ inhliziyo yami yavutha phakathi kwami, yavutha njengomlilo ngisacabanga; ngasengikhuluma ngolimi lwami,

⁴ ngathi: Nkosi, ngitshengisa ukuphela kwami lensuku zami ukuba zingakanani, ukuba ngazi ukuthi ukuphila kwami kuyadlula.

⁵ Khangela, insuku zami wazenza zaba ngangobubanzi besandla, lensuku zokuphila kwami kazisilutho kuwe; impela ilowo lalowomuntu ungumoya nje.

⁶ Umuntu uhamba njengesithunzi nje; uyahlupheka ngeze; ubutha imfuyo, kodwa kazi ukuthi ngubani ozakuyidla.

⁷ Phoke, Nkosi, ngingathembani na? Ithemba lami likuwe.

⁸ Ngikhulula kuzo zonke iziphambeko zami. Ungangenzi ngibe yinhlekisa yezithutha.

⁹ Ngiyathula, kangivuli umlomo wami, ngoba nguwe okwenzileyo.

¹⁰ Ungabe usangitshaya, ngoba ngibulewe yizidutshulo zesandla sakho.

¹¹ Lapho ulaya umuntu umkhuza ngenxa yesono, okuligugu kuye uyakuqeda njengenondo; impela ilowo lalowomuntu ungumoya nje.

¹² Zwana ukukhuleka kwami, Nkosi, ulalele ukucela kwami; ungathuli ngezinyembezi zami, ngoba ngiyisethekeli sakho lesihambi njengabo bonke okhokho.

¹³ Ungangihwaqeli ukuze ngijabule, ngingakasuki lapha, ngingabe ngisaba khona.