AmaHubo 38 - iBhayibhili Elingcwele 1978

Umkhuleko wohluphekayo

¹ Nkosi, ungangikhalimeli ngentukuthelo yakho, ungangitshayi ngolaka lwakho.

² Ngoba imitshoko yakho ihlabe yatshona kimi, lesandla sakho sicindezele nzima phezu kwami.

³ Kakukho ukuphila emzimbeni wami ngenxa yentukuthelo yakho; kayikho impilo emathanjeni ami ngenxa yesono sami.

⁴ Ngoba iziphambeko zami zimbomboze ikhanda lami, ziyangisinda njengomthwalo onzima.

⁵ Izilonda zami ziyanuka, ziphiqika ubomvu, ngenxa yobuthutha bami;

⁶ ngigungubele, ngawiselwa phansi, usuku lonke ngihamba ngilila.

⁷ Ngoba ukhalo lwami luyatshotshozela kakhulu, kakukho ukuphila emzimbeni wami.

⁸ Ngibuthakathaka ngilimele kakhulu, ngiyakhala ngenxa yokukhathazeka kwenhliziyo yami.

⁹ Nkosi, ukufisa kwami konke kuyaziwa nguwe, lokububula kwami kakufihlakalanga kuwe.

¹⁰ Inhliziyo yami iyatshaya, amandla ami ayaphela; lokukhanya kwamehlo ami sekufiphele.

¹¹ Abangane bami labanakwethu bema khatshana lokuhlupheka kwami, labakwethu bema khatshana lami.

¹² Labo abazingela ukuphila kwami bayangithiya, labo abafuna ukungilimaza bakhuluma okubi, becabanga inkohliso usuku lonke.

¹³ Kodwa mina nginjengesacuthe, kangizwa, nginjengesimungulu, kangikhulumi.

¹⁴ Yebo, nginjengomuntu ongezwayo, okungekho ukuphikisa emlonyeni wakhe.

¹⁵ Kodwa mina, Nkosi, ngithemba wena; nguwe, Nkosi Nkulunkulu wami, ozakungiphendula.

¹⁶ Ngoba ngakhuleka ngathi: Ungabavumeli ukuba bathokoze ngami, abazincoma ngami lapho unyawo lwami lutshelela.

¹⁷ Ngoba sengiseduze lokuwa, lobuhlungu bami buphezu kwami izikhathi zonke.

¹⁸ Ngiyavuma ukona kwami, ngiyadabuka ngesono sami.

¹⁹ Abayizitha zami ngaphandle kwecala balamandla, abangizondayo ngeze banengi.

²⁰ Abangiphindisela okuhle ngokubi bamelene lami, ngoba ngenza okulungileyo.

²¹ Ungangitshiyi, Nkosi; Nkulunkulu wami, ungabi khatshana lami.

²² Phangisa ungisize, Nkosi yokukhululwa kwami.