AmaHubo 37 - iBhayibhili Elingcwele 1978

Okuzakwehlela ababi labalungileyo

¹ Ungazikhathazi ngababi, ungabi lamhawu ngabenza okubi.

² Ngoba bazakoma njengotshani, babune njengezihlahlana eziluhlaza.

³ Themba eNkosini, wenze okuhle, uhlale elizweni ngokuthembeka.

⁴ Thokoza eNkosini, yona izakukunika izifiso zenhliziyo yakho.

⁵ Nikela impilo yakho eNkosini, uyithembe, yona izakukusiza.

⁶ Yona izakuveza ukulunga kwakho njengokukhanya, lelungelo lakho njengemini.

⁷ Thula phambi kweNkosi, ulindele yona; ungazikhathazi ngolenhlanhla, ngomuntu owenza amacebo amabi.

⁸ Zithinte ekuthukutheleni, uyekele ulaka; ungazikhathazi, ngoba kubanga ukona.

⁹ Ngoba ababi bazakuchithwa, kodwa labo abathemba iNkosi bazakulifuya ilizwe.

¹⁰ Kuseyisikhatshana nje ukuba omubi angabe esaba khona; loba uhlola indawo yakhe uzakuba engasekho.

¹¹ Kodwa abamnene bazakufuya ilizwe, bazithokozise ngenala enkulu.

¹² Omubi uzamsongela olungileyo, amgedlele amazinyo akhe.

¹³ Kodwa iNkosi iyamhleka omubi, ngoba iyabona ukuthi usuku lwakhe lokucina luyeza.

¹⁴ Ababi bayawuhwatsha umkhonto, bagobise amadandili abo, ukuba bamlahle phansi ohluphekayo loswelayo, bababulale labo abahamba ngobuqotho.

¹⁵ Imikhonto yabo izakugwaza ezabo inhliziyo, kwaphulwe amadandili abo.

¹⁶ Okuncinyane alakho olungileyo kungcono kulenotho yababi abanengi.

¹⁷ Ngoba amandla ababi azakwaphulwa, kodwa iNkosi iyamsekela olungileyo.

¹⁸ INkosi iyalondoloza abaqotho, lelizwe labo lizakuma kuze kube nininini;

¹⁹ kabakhathazeki esikhathini esibi, bayasutha ensukwini zendlala.

²⁰ Kodwa ababi bazakubhubha; izitha zeNkosi zizakunyamalala njengobuhle bamadlelo, zinyamalale njengentuthu.

²¹ Omubi uyeboleka, angabuyiseli, kodwa olungileyo ulesihawu, uyaphana.

²² Ngakho labo ababusiswe yiNkosi bazakulifuya ilizwe, kodwa labo abathukwe yiyo bazakuchithwa.

²³ Izinyathelo zomuntu ziqondiswa yiNkosi, iyamqinisa lowo othanda izindlela zayo;

²⁴ loba esiwa, kayikutshayeka phansi, ngoba iNkosi ibamba isandla sakhe.

²⁵ Ngangimutsha, khathesi sengimdala, kanti kangizanga ngimbone olungileyo elahliwe, labantwana bakhe bephanza ukudla.

²⁶ Uhlala ephana, eseboleka abanye, labantwana bakhe baba yisibusiso.

²⁷ Suka kukho okubi, wenze okuhle; uzakuhlala kuze kube nininini.

²⁸ Ngoba iNkosi ithanda ukulunga, kayiyikubatshiya abalungileyo bayo. Abalungileyo bazakulondolozwa kuze kube nininini, kodwa abantwana bababi bazakuchithwa.

²⁹ Abalungileyo bazakulifuya ilizwe, bahlale kulo kuze kube nininini.

³⁰ Umlomo wolungileyo ukhuluma ukuhlakanipha, lolimi lwakhe lukhuluma ukulunga.

³¹ Umlayo kaNkulunkulu wakhe usenhliziyweni yakhe; izinyathelo zakhe kazitsheleli.

³² Omubi uyamqaphela olungileyo, ufuna ukumbulala.

³³ INkosi kayiyikumnikela emandleni akhe, kayiyikumlahla lapho ethonisiswa.

³⁴ Themba iNkosi, unamathele endleleni yayo, izakukuphakamisa, ulifuye ilizwe, ubukele ukuchithwa kwababi.

³⁵ Ngake ngambona omubi owesabekayo, eyinkalakatha njengesihlahla saseLebanoni;

³⁶ wedlula, kabe esaba khona; lalapho sengimdinga, kangisamfumananga.

³⁷ Mqhaphelise olungileyo, umbone oqotho, ngoba umuntu wokuthula ulenzalo.

³⁸ Kodwa abaphambukayo bazakubhujiswa bonke; inzalo yababi izakuchithwa.

³⁹ Ukukhululwa kwabalungileyo kuvela eNkosini; iyinqaba yabo esikhathini sokuhlupheka.

⁴⁰ INkosi iyabasiza ibakhulule; iyabakhulula kibo ababi, ibasize, ngoba baphephela kuyo.