AmaHubo 35 - iBhayibhili Elingcwele 1978

Umkhuleko wokucela ukophulwa ezitheni

¹ Nkosi, melana labamelana lami, ulwe labo abalwa lami.

² Thatha ihawu lesihlangu, uvuke ungisize.

³ Hwatsha umkhonto, ungivikele kwabangizingelayo; tshono kimi ukuthi: Mina ngiyikukhululwa kwakho.

⁴ Kabayangeke babe lehlazo labo abafuna ukuphila kwami. Kabahlehliselwe emuva, bahlatshwe zinhloni labo abangisongelayo.

⁵ Kababe njengomule ophetshulwa ngumoya, isithunywa seNkosi sibadudule.

⁶ Indlela yabo kayibe mnyama itshelele, isithunywa seNkosi sibaxotshe.

⁷ Ngoba bangithiya ngingelacala, ngingelacala bangimbela igodi.

⁸ Ukubhujiswa kakubajume, lembule abangithiye ngalo libabambe, bawele kulo, babhujiswe.

⁹ Ng’khonake umphefumulo wami uzakuthokoza eNkosini, ujabule ngokukhulula kwayo.

¹⁰ Wonke amathambo ami azakuthi: Nkosi, ngubani onjengawe, okhulula ababuthakathaka kubo abalamandla, ababuthakathaka labaswelayo kubo ababaphangayo na?

¹¹ Ofakazi abangalunganga bangivukele, bangibuza izinto engingazaziyo.

¹² Bangiphindisela okuhle ngokubi; umphefumulo wami udabukile.

¹³ Kanti ekuguleni kwabo ngagqoka ezokuzila, ngazihlupha ngokuzila ukudla, ngakhuleka ngikhothamise ikhanda lami,

¹⁴ ngokungathi ngikhalela umngane wami lomfbethu; ngahamba ngikhotheme njengomuntu olilela unina.

¹⁵ Kodwa ekukhubekeni kwami bahlekisana ngami, babuthana ndawonye ukuba bangiklolodele; abantu engangibazi bangihlasela bengakhawuli,

¹⁶ bangiklolodela futhifuthi begedla amazinyo abo.

¹⁷ Nkosi, uzakukubukela lokhu kuze kube nini na? Ngophula ekubhubhiseni kwabo, lokuphila kwami ezilwaneni lezi.

¹⁸ Ng’khonake ngizakukubonga ebandleni elikhulu, ngikudumise phakathi kwabantu abanengi.

¹⁹ Bangajabuli ngami abayizitha zami ngaphandle kwecala, bangangificeli ilihlo labo abangizonda ngeze.

²⁰ Ngoba kabakhulumi okuhle, kodwa bacabanga amazwi enkohliso ngabachumileyo emhlabeni.

²¹ Bangikhamisela kakhulu imilomo yabo besithi: Hiya belo! amehlo ethu akubonile.

²² Nkosi, usukubonile; ungathuli. Nkosi, ungabi khatshana lami.

²³ Vuka, umele ilungelo lami, umele indaba yami, Nkulunkulu wami, Nkosi yami.

²⁴ Ngahlulela, Nkosi Nkulunkulu wami, ngokulunga kwakho; ungavumi ukuba bathokoze ngami.

²⁵ Bangatsho ukuthi: Ha, kwaya ngesifiso senhliziyo zethu! Bangatsho ukuthi: Simginyile.

²⁶ Kabayangeke babe lenhloni abajabula ngenxa yokuhlupheka kwami; babanjwe zinhloni bayangeke labo abazikhukhumeza ngami.

²⁷ Kodwa labo abathokoza ngokuqonda kwami kabamemeze bathabe kakhulu, batsho njalonjalo ukuthi: Yinkulu iNkosi ethokoza ngokuphumelela kwenceku yayo.

²⁸ Umlomo wami uzakutshumayela ngokulunga kwakho langodumo lwakho usuku lonke.