AmaHubo 34 - iBhayibhili Elingcwele 1978

Ukubonga ngokulunga kweNkosi

¹ Ngizakuyibonga iNkosi ngezibanga zonke; ukudunyiswa kwayo kuzakuhlala kusemlonyeni wami.

² Umphefumulo wami uyazincoma ngeNkosi; abahluphekayo kabezwe bathokoze.

³ Dumisani iNkosi kanye lami, asidumise ibizo layo kanyekanye.

⁴ Ngakhuleka eNkosini, yangizwa, yangikhulula kukho konke ukwesaba kwami.

⁵ Khangelani kuyo, lithokoze, ubuso benu kabusoze bube lenhloni.

⁶ Lesisihlupheki sakhala eNkosini, yasizwa, yasikhulula kuzo zonke inkathazo zaso.

⁷ Isithunywa seNkosi siyabavikela labo abayesabayo, sibakhulule.

⁸ Zwanini libone ukuthi iNkosi ilungile. Ubusisiwe lowomuntu ophephela kuyo.

⁹ Yesabeni iNkosi, lina abalungileyo bayo, ngoba kabasweli lutho abayesabayo.

¹⁰ Izilwane ziyaswela zilambe, kodwa labo abayidingayo iNkosi kabasweli lutho oluhle.

¹¹ Wozani, bantwana, lingilalele, ngizakulifundisa ukuyesaba iNkosi.

¹² Ngubani kini othanda ukuphila, ofisa insuku ezinengi ukuba abone okuhle na?

¹³ Nqanda ulimi lwakho kokubi, lomlomo wakho ekukhulumeni inkohliso.

¹⁴ Suka kukho okubi, wenze okuhle, dinga ukuthula, ukunxwanele.

¹⁵ Amehlo eNkosi akubo abalungileyo, lezindlebe zayo zilalela ukukhala kwabo.

¹⁶ Kodwa imelana labenza okubi, ukuba iqede ukukhunjulwa kwabo emhlabeni.

¹⁷ Lapho abalungileyo bekhala, iNkosi iyabezwa, ibakhulule kuzo zonke izinhlupheko zabo.

¹⁸ INkosi iseduze labo abalenhliziyo ezidabukileyo, iyabasiza abalomoya odabukileyo.

¹⁹ Zinengi inhlupheko zolungileyo, kodwa iNkosi iyamkhulula kuzo zonke.

²⁰ Iyawalondoloza wonke amathambo akhe, kakwaphuki lelilodwa kuwo.

²¹ Okubi kuzakumbulala omubi; abazonda abalungileyo bazalahlwa.

²² INkosi iyakhulula ukuphila kwezinceku zayo; abathemba kuyo ozakulahlwa.