AmaHubo 33 - iBhayibhili Elingcwele 1978

Ukudumisa iNkosi

¹ Jabulani eNkosini, lina abalungileyo. Ukudumisa kubafanele abaqotho.

² Dumisani iNkosi ngechacho, lihlabelele kuyo ngechacho elilentambo ezilitshumi.

³ Ihlabeleleni ingoma entsha, litshaye kuhle ngenhlokomo.

⁴ Ilizwi leNkosi liqotho, wonke umsebenzi wayo wenziwe ngobuqotho.

⁵ Ithanda ukulunga lokwahlulela; umhlaba ugcwele uthando lwayo olungapheliyo.

⁶ Ngelizwi leNkosi enziwa amazulu, lakho konke okukuwo ngomoya womlomo wayo.

⁷ Ibuthelela amanzi olwandle kungathi asembizeni, ifake ulwandle esiphaleni.

⁸ Umhlaba wonke kawuyesabe iNkosi, bonke abakhileyo emhlabeni kabathuthumele phambi kwayo.

⁹ Ngoba yakhuluma, umhlaba waba khona, yalaya, wema waqina.

¹⁰ INkosi ichitha icebo lezizwe, iphuthisa imicabango yabantu.

¹¹ Kanti icebo leNkosi limi kuze kube nininini, lemicabango yenhliziyo yayo kuzo zonke izizukulwana.

¹² Sibusisiwe isizwe esiNkulunkulu waso yiNkosi, abantu ebakhethileyo baba ngabayo.

¹³ INkosi iyakhangela phansi isezulwini, ibabone bonke abantu;

¹⁴ isendaweni lapho ihlala khona iyabakhangela bonke abakhileyo emhlabeni,

¹⁵ yona eyenza inhliziyo zabo bonke, iqaphelise zonke izenzo zabo.

¹⁶ Kayikho inkosi esizwa yibukhulu bempi yayo, leqhawe kalikhululwa ngamandla alo amakhulu.

¹⁷ Ibhiza liyize ekunqobeni, kalisizi ngamandla alo amakhulu.

¹⁸ Khangela, ilihlo leNkosi liphezu kwabayesabayo, kwalabo abathemba othandweni lwayo olungapheliyo,

¹⁹ ukuba ikhulule imiphefumulo yabo ekufeni, ibaphilise endlaleni.

²⁰ Sithemba iNkosi; yona ilusizo lwethu lesihlangu sethu.

²¹ Inhliziyo zethu ziyathokoza ngayo, ngoba siyathemba ebizweni layo elingcwele.

²² Uthando lwakho olungapheliyo, Nkosi, kalube phezu kwethu njengokuba sithemba kuwe.