AmaHubo 32 - iBhayibhili Elingcwele 1978

Ukubusiswa kwalowo othethelelwe izono zakhe

¹ Ubusisiwe lowo osiphambeko sakhe sithethelelwe, osono sakhe sisitshekelwe.

² Ubusisiwe umuntu iNkosi engambaleli ububi, okungekho inkohliso emoyeni wakhe.

³ Lapho ngathula ukuvuma isono sami, umzimba wami waguga ngenxa yokububula kwami usuku lonke.

⁴ Ngoba emini lasebusuku isandla sakho, Nkosi, sasinzima phezu kwami; umzimba wami woma kungathi wonyiswa yikutshisa kwehlobo.

⁵ Ngasivuma isono sami kuwe, kangisifihlanga isiphambeko sami, ngathi: Ngizakuvuma iziphambeko zami eNkosini. Wena wathethelela icala lesono sami.

⁶ Ngakhoke ilowo lalowo olungileyo kakhuleke kuwe ngesikhathi sokuhlupheka. Ekukhukhuleni kwezinhlupheko ezinengi kaziyikufinyelela kuye.

⁷ Wena uyindawo yami yokucatsha, uyangilondoloza ekuhluphekeni, ungiphahle ngamahubo okukhululwa.

⁸ Ngizakukufundisa ngikutshengise indlela ozakuhamba ngayo, ngizakweluleka, ilihlo lami libe phezu kwakho.

⁹ Ungabi njengebhiza loba imbongolo engelakuqedisisa, enqandwa ngomkhala langamatomu, ukuze ikulalele.

¹⁰ Zinengi izinhlupheko zomubi, kodwa uthando olungapheliyo luyamkhusela lowo othemba eNkosini.

¹¹ Jabulani eNkosini, lithabe, lina abalungileyo; memezani, lithabe, lina lonke abaqotho enhliziyweni.