AmaHubo 30 - iBhayibhili Elingcwele 1978

Ukubonga kosilisiweyo ekufeni

¹ Ngizakukudumisa, Nkosi, ngoba ungiphakamisile, kawuvumanga ukuba izitha zami zithokoze ngami.

² Nkosi Nkulunkulu wami, ngacela usizo kuwe, wangisilisa.

³ Nkosi, uwukhuphile umphefumulo wami endaweni yabafileyo, wangikhupha endaweni yabasemgodini.

⁴ Idumiseni iNkosi, lina abangcwele bayo, libonge ibizo layo elingcwele.

⁵ Ngoba ukuthukuthela kwayo kungokwesikhatshana nje, kanti umusa wayo ungowokuphila konke. Ukukhala kungaba khona kusihlwa, kanti ukuthokoza kuyafika ekuseni.

⁶ Mina ngathi ekuphumeleleni kwami: Kangiyikunyikinywa.

⁷ Ngomusa wakho, Nkosi, wangiqinisa njengentaba; wabufihla ubuso bakho, ngaba lokwesaba.

⁸ Ngakhala kuwe, Nkosi; nganxusa kuwe,

⁹ ngathi: Kuzakukusizani ukufa kwami lokutshona kwami emgodini na? Abafileyo bazakukudumisa, batshumayele ubuqotho bakho na?

¹⁰ Zwana, Nkosi, ube lomusa kimi; Nkosi, woba ngumsizi wami.

¹¹ Uphendule ukukhala kwami kwaba yikusina; ungikhuphile izingubo zami zokulila, wangambathisa ukuthokoza,

¹² ukuze umphefumulo wami ukudumise ungathuli. Nkosi, Nkulunkulu wami, ngizakukubonga kuze kube nini lanini.