AmaHubo 28 - iBhayibhili Elingcwele 1978

Umkhuleko wokucela ukusizwa lowokubonga ngokusizwa

¹ Ngiyakhala kuwe, Nkosi; dwala lami, ungangivaleli indlebe, funa kuthi uba uthula, ngibe njengalabo abafileyo.

² Zwana ilizwi lokunxusa kwami lapho ngikhala kuwe, lapho ngiphakamisela izandla zami ngasendaweni yakho engcwele.

³ Ungangikhukhuli kanye lababi lalabo abenza okubi, abakhuluma kuhle labomakhelwana babo, kanti kukhona okubi enhliziyweni zabo.

⁴ Ubanike njengokwenza kwabo, lanjengobubi bezenzo zabo; ubanike njengokwenza kwezandla zabo, ubaphindisele abakwenzileyo.

⁵ Ngoba kabayinanzi imisebenzi yeNkosi lokwenza kwezandla zayo; izakubabhidliza ingaphindi ibakhe futhi.

⁶ Kayibongwe iNkosi, ngoba ilizwile ilizwi lokunxusa kwami.

⁷ INkosi ingamandla ami lesihlangu sami; inhliziyo yami ithemba kuyo; iyangisiza, ngakho inhliziyo yami iyathokoza, ngiyibonge ngengoma yami.

⁸ INkosi ingamandla abantu bayo, iyinqaba yokukhululwa kogcotshiweyo wayo.

⁹ Siza abantu bakho, ubusise isizwe sakho, ube ngumalusi wabo, ubagcine kuze kube nininini.