AmaHubo 27 - iBhayibhili Elingcwele 1978

INkosi iyikukhanya kwami lokukhululwa kwami

¹ INkosi iyikukhanya kwami lokukhululwa kwami; ngizakwesaba bani na? INkosi iyinqaba yokuphila kwami; ngizakwesaba bani na?

² Lapho ababi bengihlasela, befisa ukungibulala, abamelana lami lezitha zami bazakhubeka bawe.

³ Loba impi ingivimbezela, inhliziyo yami kayiyikwesaba; loba ngivelelwa yikulwa, ngizakuba lesibindi.

⁴ Into yinye engiyicela eNkosini engizakuyifunisisa, yikuba ngihlale endlini yeNkosi insuku zonke zokuphila kwami, ukuba ngibone ubuhle beNkosi, ngibuke ithempeli layo.

⁵ Izakungithukuza edumbeni layo ngosuku lokuhlupheka, ingifihle ekusithekeni kwethente layo, ingibeke phezu kwedwala.

⁶ Ngizaliphakamisela ikhanda lami ngaphezu kwezitha zami ezingihanqileyo; ngizakunikela iminikelo yokuthaba ethenteni layo, ngizakuhlabela ngidumise iNkosi.

⁷ Zwana, Nkosi, lapho ngikhalayo, ngihawukela, ungiphendule.

⁸ Wena uthe: Funani ubuso bami. Inhliziyo yami ithi kuwe: Ubuso bakho, Nkosi, ngizakubufuna.

⁹ Ungangifihleli ubuso bakho. Ungayixotshi inceku yakho ngokuthukuthela, wena obulusizo lwami, ungangixotshi, ungangitshiyi, Nkulunkulu wokukhululwa kwami.

¹⁰ Lapho umama lobaba bengitshiya, iNkosi izakungilondoloza.

¹¹ Ngifundisa indlela yakho, Nkosi, ungihole endleleni ekhanyayo ngenxa yezitha zami.

¹² Unganginikeli ezitheni zami, ngoba ofakazi bamanga bangivukele, bavutha ulaka.

¹³ Ngithemba ukuthi ngizakubona okuhle kweNkosi ngiseselizweni labaphilayo.

¹⁴ Themba iNkosi, uqine, inhliziyo yakho ime isibindi, yebo, themba iNkosi.