AmaHubo 25 - iBhayibhili Elingcwele 1978

Umkhuleko wokucela ukuholwa lokuthethelelwa lokuvikelwa

¹ Nkosi, ngiphakamisela kuwe umphefumulo wami.

² Nkulunkulu wami, ngithemba kuwe; ungavumeli ukuba ngiyangeke; izitha zami kazingathokozi ngami.

³ Yebo, kungayangeki loyedwa kulabo abathemba kuwe, kodwa kabayangeke labo abona ngabomu.

⁴ Ngazisa izindlela zakho, Nkosi, ungifundise imikhondo yakho.

⁵ Ngiholela eqinisweni lakho, ungifundise, ngoba wena unguNkulunkulu lomsilisi wami; ngilindele wena usuku lonke.

⁶ Khumbula isihawu sakho, Nkosi, ukhumbule uthando lwakho olungapheliyo, ngoba kwakukhona kusukela endulo.

⁷ Ungazikhumbuli izono zobutsha bami kanye leziphambeko zami; ngenxa yothando lwakho olungapheliyo ungikhumbule, ngenxa yokulunga kwakho, Nkosi.

⁸ INkosi ilungile iqondile; ngakhoke iyazifundisa izoni indlela ezingahamba ngayo;

⁹ abathobekileyo ibaholela kokulungileyo, ibafundise indlela yayo.

¹⁰ Zonke indlela zeNkosi ziluthando, leqiniso kulabo abalondoloza isivumelwano sayo lemithetho yayo.

¹¹ Ngenxa yebizo lakho, Nkosi, ngithethelela ukona kwami, ngoba kukhulu.

¹² Nguwuphi umuntu oyesabayo iNkosi? Lowo izakumfundisa indlela ezakuyikhetha.

¹³ Yena uzakuphumelela, labantwana bakhe bazakulifuya ilizwe.

¹⁴ Ubuhlobo beNkosi bungobalabo abayesabayo, iyabazisa isivumelwano sayo.

¹⁵ Amehlo ami ahlala ekhangele kuyo iNkosi, ngoba izakukhupha inyawo zami embuleni.

¹⁶ Ngikhangela, Nkosi, ube lomusa, ngoba ngilesizungu, ngihluphekile.

¹⁷ Khulula inhliziyo yami ezinkathazweni, ungikhuphe ezinhluphekweni zami.

¹⁸ Khangela ukuhlupheka kwami lenkathazo yami, ungithethelele zonke izono zami.

¹⁹ Khangela izitha zami ngoba zinengi, ziyangizonda ngenzondo enkulu.

²⁰ Londoloza ukuphila kwami, ungikhulule, ungangiyangisi, ngiphephela kuwe.

²¹ Ubuqotho lokulunga kakungilondoloze, ngoba ngithembele kuwe.

²² Khulula uIsrayeli, Nkosi, kuzo zonke izinkathazo zakhe.