AmaHubo 22 - iBhayibhili Elingcwele 1978

Ukukhala okulosizi. Ukudumisa iNkosi

¹ Nkulunkulu wami, Nkulunkulu wami, ungitshiyeleni na? Kungani ukhatshana lokungisiza, ukhatshana lamazwi okububula kwami na?

² Nkulunkulu wami, ngiyakhala emini, kodwa kawungiphenduli, lebusuku, kodwa kangilakho ukuphumula.

³ Kanti wena ungoNgcwele, udunyiswa ngabakoIsrayeli.

⁴ Okhokho bathemba kuwe, bathemba, wena wabakhulula.

⁵ Bakhala kuwe, bakhululwa, bathemba wena, kabayangekanga.

⁶ Kodwa mina ngiyimpethu, kangisuye muntu, ngihlekwa ngabantu, ngeyiswe yibo bonke.

⁷ Bonke abangibonayo bayangihleka, bangikhamisela imilomo, banikine amakhanda abo,

⁸ besithi: Wathemba iNkosi; kayimkhulule, imophule, ngoba iyamthanda.

⁹ Impela nguwe owangikhupha esiswini, wangilondoloza ngisemabeleni kamama.

¹⁰ Nganikelwa kuwe kusukela ekuzalweni kwami, unguNkulunkulu wami kusukela ekuzalweni kwami ngumama.

¹¹ Ungabi khatshana lami, ngoba inhlupheko iseduze, kakho osizayo.

¹² Inkunzi ezinengi zingihanqile, inkunzi ezilamandla zaseBashani zingizingelezele;

¹³ zingikhamisela imilomo yazo njengezilwane eziphangayo lezibhongayo.

¹⁴ Ngichithiwe njengamanzi, wonke amathambo ami anyele, inhliziyo yami injengengcino, incibilikile phakathi kwami.

¹⁵ Umlomo wami womile njengodengezi, lolimi lwami lunamathele emihlathini yami; ungitshiya othulini lokufa.

¹⁶ Yebo, izinja zingibuthanele, lexuku lababi lingihanqile; izandla zami lenyawo zami bazibhobozile.

¹⁷ Ngingabala wonke amathambo ami; bayangijolozela bengiklolodela.

¹⁸ Babelana ingubo zami, benzelana inkatho ngezambatho zami.

¹⁹ Kodwa, wena Nkosi, kawungabi khatshana; wena msizi wami, phangisa ungisize.

²⁰ Khulula umphefumulo wami kuwo umkhonto, lokuphila kwami emandleni ezinja.

²¹ Ngophula emlonyeni wesilwane, lomphefumulo wami empondweni zenyathi.

²² Ngizakubatshumayeza abafowethu ibizo lakho, ngikudumise phakathi kwebandla.

²³ Lina elesaba iNkosi ibongeni, lina lonke nzalo kaJakobe, idumiseni, liyesabe lina lonke nzalo kaIsrayeli.

²⁴ Ngoba kayimdelelanga ohluphekayo, kayinengwanga yikuhlupheka kwakhe; kayimfihlelanga ubuso bayo, kodwa lapho ekhala kuyo, imzwile.

²⁵ Kuvela kuwe ukudumisa kwami ebandleni elikhulu; izithembiso zami ngizakuzigcwalisa phambi kwalabo abayesabayo.

²⁶ Abayanga bazakudla basuthe; abafuna iNkosi bazakuyidumisa. Inhliziyo zenu kaziphile kuze kube nininini.

²⁷ Imikhawulo yonke yomhlaba izakukhumbula, iphendukele eNkosini; lezizukulwana zonke zezizwe zizakhonza phambi kwayo.

²⁸ Ngoba umbuso ungoweNkosi, yiyo ebusa izizwe.

²⁹ Zonke izipatsha zomhlaba zizakhuleka kuyo, bonke abasebeseduze lokufa bazakhothama kuyo.

³⁰ Inzalo izakuyikhonza; isizukulwana esizayo sizakutshelwa ngayo iNkosi,

³¹ labantu abazazalwa bazatshelwa ukuba lokhu kwenziwe yiNkosi.