AmaHubo 21 - iBhayibhili Elingcwele 1978

Ukubonga uNkulunkulu ngokukhululwa

¹ Nkosi, inkosi iyajabula ngamandla akho, iyathaba kakhulu ngokusiza kwakho.

² Uyinikile isifiso senhliziyo yayo, kawalanga ukucela kwayo.

³ Wayihlangabeza ngezibusiso zokuhle, wayethwesa umqhele wegolide elihle ekhanda layo.

⁴ Yacela ukuphila kuwe, wayinika khona, insuku ezinengi kuze kube nini lanini.

⁵ Lukhulu udumo lwayo ngenxa yokusiza kwakho, ubukhosi lobukhulu wabubeka phezu kwayo.

⁶ Yebo, uyayibusisa kuze kube nini lanini, uyayithokozisa ngenjabulo yokubakhona kwakho.

⁷ Ngoba inkosi iyathemba kuNkulunkulu, langenxa yothando olungapheliyo loPhezukonke kayizukunyikinywa.

⁸ Isandla sakho, nkosi, sizakuzifumana zonke izitha zakho, lesandla sakho sokunene sizakubafumana labo abakuzondayo.

⁹ Uzakubabhubhisa njengomlilo ovuthayo ekufikeni kwakho. INkosi izakubaginya ekuthukutheleni kwayo, lomlilo uzakubaqothula.

¹⁰ Uzakuchitha inzalo yabo emhlabeni, labantwana babo phakathi kwabantu.

¹¹ Nxa belungisela okubi ngawe, beceba okubi, bazakwahluleka;

¹² ngoba uzakubachitha, uzakubakhomba ebusweni ngemitshoko yakho.

¹³ Vuka, Nkosi, ngamandla akho! Thina sizakuhlabela sidumise amandla akho.