AmaHubo 18 - iBhayibhili Elingcwele 1978

Ihubo likaDavida lokubonga uNkulunkulu ngokukhululwa

¹ Ngiyakuthanda, Nkosi, mandla ami.

² INkosi ilidwala lami, lenqaba yami, lomkhululi wami; uNkulunkulu wami ulidwala lami engiphephela kulo, lesihlangu sami, lesivikelo sami lenqaba yami.

³ Ngizakhuleka eNkosini efanele ukudunyiswa, ngikhululwe ezitheni zami.

⁴ Izibopho zokufa zangizingelezela, lezikhukhula zokubhujiswa zangethusa.

⁵ Izibopho zendawo yabafileyo zangithandela, lemijibila yokufa yangivimbela.

⁶ Ekuhluphekeni kwami ngakhuleka eNkosini, ngakhala kuNkulunkulu wami; walizwa ilizwi lami esethempelini lakhe, ukukhala kwami kwafinyelela endlebeni zakhe.

⁷ Umhlaba wazamazama, wagedezela; lezisekelo zezintaba zaqhaqhazela, zazamazama, ngoba wayethukuthele.

⁸ Kwaphuma intuthu emakhaleni akhe, lomlilo otshisayo emlonyeni wakhe; amalahle avuthayo aphuma kuye.

⁹ Wadabula amazulu, wehlela phansi, umnyama omkhulu wawungaphansi kwenyawo zakhe.

¹⁰ Wakhwela phezu kwekherubi, waphapha, waphapha ngamaphiko omoya.

¹¹ Wenza umnyama waba yisisibekelo sakhe, wazisitha ngamayezi amnyama agcwele amanzi.

¹² Ekukhanyeni okuphambi kwakhe amayezi akhe athela isiqhotho lamalahle omlilo.

¹³ INkosi yakhwaza isemazulwini, oPhezukonke wazwakalisa ilizwi lakhe.

¹⁴ Yathuma imitshoko yayo, yabachitha; yaphazimisa imibane, yabaphaphathekisa.

¹⁵ Ng’khona kwabonakala itshebetshebe elingaphansi kolwandle, kwambulwa lezisekelo zomhlaba ekukhwazeni kwakho, Nkosi, ekufutheni komoya wamakhala akho.

¹⁶ Yaselula isandla sayo iphezulu, yangibamba, yangikhupha emanzini amanengi.

¹⁷ Yangophula esitheni sami esilamandla, lakibo abangizondayo, ngoba basebengahlule.

¹⁸ Bangifikela osukwini losizi lwami; kodwa iNkosi yaba yinsika yami.

¹⁹ Yangikhuphela endaweni ebanzi, yangikhulula ngoba ibingithanda.

²⁰ INkosi yangipha umvuzo ofanele ukulunga kwami; yangibuyisela ngokufanele ukuhlambuluka kwezandla zami.

²¹ Ngoba ngizilondolozile indlela zeNkosi, kangimukanga eNkosini yami ngokubi.

²² Ngoba zonke izimiso zayo zaziphambi kwami, kangiyidelanga imithetho yayo.

²³ Ngangimsulwa phambi kwayo, ngibuxwayile ububi.

²⁴ Ngakhoke iNkosi ingibuyisele ngokufanele ukulunga kwami, ngokufanele ukuhlambuluka kwezandla zami phambi kwayo.

²⁵ Kothembekileyo wena Nkosi, uyaziveza uthembekile; kopheleleyo uyaziveza uphelele;

²⁶ kohlambulukileyo uyaziveza uhlambulukile; lakongaqondanga uyaziveza ungaqondanga.

²⁷ Ngoba wena uyabakhulula abantu abathobekileyo; kodwa abantu abazigqajayo uyabehlisela phansi.

²⁸ Yebo, wena uyalumathisa isibane sami; iNkosi, uNkulunkulu wami, iyakhanyisa umnyama wami.

²⁹ Ngawe ngingahlula impi; ngoNkulunkulu ngingeqa umthangala.

³⁰ Lo uNkulunkulu indlela yakhe iphelele; ilizwi leNkosi lithembekile. Yena uyisihlangu kubo bonke abaphephela kuye.

³¹ Ngoba ngubani onguNkulunkulu ngaphandle kweNkosi na? Ngubani olidwala ngaphandle kukaNkulunkulu wethu na?

³² uNkulunkulu ongambathisa amandla, owenza indlela yami ibe lula.

³³ Wenza inyawo zami zibe njengezempala, wangimisa ezingqongeni,

³⁴ ofundisa izandla zami ukulwa, ukuze ingalo zami zigobise idandili lethusi.

³⁵ Wena unginikile isihlangu senkululeko yakho, lesandla sakho sokunene singisekele, losizo lwakho lungikhulisile.

³⁶ Wenzile zaba banzi izinyathelo zami, lenyawo zami kazitshelelanga.

³⁷ Ngaxotshana lezitha zami, ngazifica, kangibuyanga ngingakaziqedi.

³⁸ Ngazigwaza, zaze zehluleka ukuvuka, zawa ngaphansi kwenyawo zami.

³⁹ Ngoba wena wangambathisa amandla okulwa, wabawisela phansi abayizitha zami.

⁴⁰ Wazenza zingibalekele izitha zami, labangizondayo ngababhubhisa.

⁴¹ Bakhala, kodwa kakubanga khona abasizayo; bakhala eNkosini, kodwa kayiphendulanga.

⁴² Ngabachola baba njengothuli phambi komoya, ngabanyathela njengodaka lwendlela.

⁴³ Wangikhulula esiphithiphithini sabantu, wangimisa ngaba yinhloko yezizwe; abantu engangingabazi bangisebenzela.

⁴⁴ Banela ukungizwa nje ngendaba bangilalela; abezizweni bazithoba phambi kwami.

⁴⁵ Abezizweni bethuka, baphuma ezinqabeni zabo bethuthumela.

⁴⁶ INkosi ikhona; kalidunyiswe idwala lami, kaphakanyiswe uNkulunkulu wokukhululwa kwami;

⁴⁷ uNkulunkulu onginike impindiselo wanginqobela izizwe;

⁴⁸ ongikhulule ezitheni zami; wena wangiphakamisa phezu kwezitha zami, wangikhulula ebantwini ababi.

⁴⁹ Ngenxa yalokhu ngizakukubonga phakathi kwezizwe, Nkosi, ngihubele ibizo lakho.

⁵⁰ Uyanika inkosi yakhe ukunqoba okukhulu, ebonakalisa uthando lwakhe olungapheliyo kogcotshiweyo wakhe uDavida, lenzalweni yakhe kuze kube nininini.