AmaHubo 148 - iBhayibhili Elingcwele 1978

Izidalwa zonke kazidumise iNkosi

¹ Dumisani iNkosi! Dumisani iNkosi ezulwini, idumiseni kweliphezulu.

² Idumiseni lina zithunywa zayo zonke. Idumiseni lina mabandla ayo wonke asezulwini.

³ Idumiseni lina langa lenyanga. Idumiseni lina zinkanyezi zonke ezikhanyayo.

⁴ Idumiseni lina mazulu aphezulu, lani manzi aphezu kwamazulu.

⁵ Konke kakudumise ibizo leNkosi; ngoba yalaya, kwenziwa.

⁶ Yakumisa kuze kube nininini; yakumisela imingcele ukuba kungayeqi.

⁷ Dumisani iNkosi emhlabeni, lina zilo ezesabekayo zolwandle, lani zinsiki zonke,

⁸ lani mililo lesiqhotho longqoqwane leliqhwa, leziphepha ezilalela ilizwi layo;

⁹ zintaba lamaqaqa wonke, zihlahla ezithelayo lezihlahla zomkusu zonke,

¹⁰ zinyamazana zeganga lezifuyo zonke, zinto ezihahabayo lenyoni eziphaphayo.

¹¹ Lani makhosi omhlaba, lani zizwe zonke, zikhulu, lani babusi bomhlaba,

¹² zinsizwa, lani zintombi, maxhegu labantwana.

¹³ Kabadumise ibizo leNkosi, ngoba ngelayo ibizo lodwa eliphakemeyo; ubukhosi bayo buphezu komhlaba lezulu.

¹⁴ Iphakamisile abantu bayo; ngalokhu abangcwele bayo bayayidumisa, abantu bakoIsrayeli abaseduze layo. Dumisani iNkosi!