AmaHubo 147 - iBhayibhili Elingcwele 1978

Ukudumisa uNkulunkulu, uSomandla

¹ Dumisani iNkosi! Ngoba kuhle ukudumisa uNkulunkulu wethu, kuhle ukumdumisa, njalo kufanele.

² INkosi iyalakha iJerusalema, iqoqe bonke abahlakazekileyo bakoIsrayeli.

³ Ipholisa inhliziyo ezidabukileyo, ibophe amanxeba azo.

⁴ Iyabala inani lezinkanyezi, izibize zonke ngamabizo azo.

⁵ INkosi yethu yinkulu, makhulu amandla ayo; ukwazi kwayo kakulakulinganiswa.

⁶ INkosi iyabalulamisa abacindezelweyo, iyawisela phansi ababi.

⁷ Hlabelelani iNkosi ingoma yokubonga; limdumise uNkulunkulu wethu ngamachacho.

⁸ Iyasibekela amazulu ngamayezi, ilungisele umhlaba izulu, ikhulise utshani emaqaqeni,

⁹ inike inyamazana ukudla kwazo, lamatsiyane ewabayi akhalayo.

¹⁰ Kayithokozi ngamandla ebhiza, kayijabuleli amandla amaqhawe.

¹¹ Kodwa iNkosi ijabulela labo abayesabayo, labo abathemba uthando lwayo olungapheliyo.

¹² Dumisa iNkosi, Jerusalema. Dumisa uNkulunkulu wakho, Ziyone.

¹³ Ngoba iyaqinisa imigoqo yamasango akho; ibusise amadodana akho phakathi kwakho.

¹⁴ Iyenza ukuthula emikhawulweni yakho; ikusuthise ngamabele amahle.

¹⁵ Iyathumela umthetho wayo emhlabeni; ilizwi layo ligijima ngesiqubu.

¹⁶ Ikhithiza ungqoqwane abe njengoboya bezimvu; ivuvuzele iliqhwa libe njengomlotha.

¹⁷ Iyaphosa isiqhotho sayo njengezigaqa; ngubani ongema emqandweni wayo na?

¹⁸ Iyathumela ilizwi layo, isiqhotho sincibilike; ivunguzise umoya wayo, amanzi ageleze.

¹⁹ Iyatshengisa ilizwi layo kuJakobe, lezimiso lezahlulelo zayo kuIsrayeli.

²⁰ Kayenzanga njalo lakwesisodwa esinye isizwe; kazizazi izahlulelo zayo. Dumisani iNkosi!