AmaHubo 145 - iBhayibhili Elingcwele 1978

Ukubonga iNkosi ngobukhulu bayo langesihawu sayo

¹ Ngizakukudumisa wena, Nkulunkulu wami leNkosi yami, ngibonge ibizo lakho kuze kube nininini.

² Insuku zonke ngizakukubonga, ngidumise ibizo lakho kuze kube nini lanini.

³ INkosi yinkulu, ifanele ukudunyiswa kakhulu, lobukhulu bayo bungehlolisiswe.

⁴ Esinye isizukulwana sizakubabaza imisebenzi yakho kwesinye, sitshumayele imisebenzi yakho elamandla.

⁵ Ngizakunakana ngodumo lwakho lobukhosi bakho, langemisebenzi yakho emangalisayo.

⁶ Abantu bazakutshumayela amandla ezenzo zakho ezesabekayo, mina ngibabaze ubukhulu bakho.

⁷ Bazakwandisa udumo lokulunga kwakho okukhulu, bahlabele kakhulu ngokulunga kwakho.

⁸ INkosi ilomusa lesihawu, iyaphuza ukuthukuthela, igcwele uthando olungapheliyo.

⁹ INkosi ilungile kubo bonke, lesihawu sayo siphezu kwakho konke ekwenzayo.

¹⁰ Imisebenzi yakho yonke izakukudumisa, Nkosi, labangcwele bakho bazakukubonga.

¹¹ Bazakukhuluma ngobukhosi bombuso wakho, balandise ngamandla akho,

¹² ukuba bazise abantu izenzo zakho zamandla, lobukhulu bobukhosi bombuso wakho.

¹³ Umbuso wakho ungumbuso ongapheliyo, lobukhosi bakho bumi kuzo zonke izizukulwana. INkosi ithembekile emazwini ayo wonke, igcwele umusa ezenzweni zayo zonke.

¹⁴ INkosi iyabasekela bonke abawayo, ibavuse bonke asebewile.

¹⁵ Amehlo abo bonke akhangele kuwe, uyabanika ukudla kwabo ngesikhathi esifaneleyo.

¹⁶ Wena uvula isandla sakho, ukholise ukufisa kwezinto zonke eziphilayo.

¹⁷ INkosi ilungile endleleni zayo zonke, ilomusa ekwenzeni kwayo konke.

¹⁸ INkosi iseduze labo bonke abakhuleka kuyo, bonke abakhuleka kuyo ngeqiniso.

¹⁹ Iyakholisa isifiso sabo bonke abayesabayo; iyezwa lokukhuleka kwabo, ibakhulule.

²⁰ Inkosi iyabalondoloza bonke abayithandayo; kodwa ababi izakubabhubhisa.

²¹ Umlomo wami uzayidumisa iNkosi, labantu bonke kababonge ibizo layo elingcwele kuze kube nininini.