AmaHubo 143 - iBhayibhili Elingcwele 1978

Ukukhulekela ukukhululwa lokuholwa

¹ Nkosi, zwana umkhuleko wami, ulalele ukunxusa kwami. Ungiphendule ngobuqotho bakho, ekulungeni kwakho.

² Ungayahluleli inceku yakho, ngoba phambi kwakho kakho loyedwa olungileyo.

³ Isitha singizingele, sangicindezela emhlabathini, sangenza ngihlale emnyameni njengabakade bafa.

⁴ Ngakhoke umoya wami uphela amandla phakathi kwami, lenhliziyo yami ithithibele phakathi kwami.

⁵ Ngiyakhumbula insuku zakudala, ngicabange ngakho konke owakwenzayo, nginakane ngokwenziwa yizandla zakho.

⁶ Ngelulele izandla zami kuwe; umphefumulo wami ukomele wena njengomhlaba owomileyo.

⁷ Phangisa ungiphendule, Nkosi; umoya wami uyaphela. Ungangifihleli ubuso bakho, funa ngibe njengalabo abafileyo.

⁸ Ngazisa uthando lwakho olungapheliyo ekuseni, ngoba ngiyathemba kuwe. Ungifundise indlela engingahamba ngayo, ngoba ngiyaphakamisela kuwe umphefumulo wami.

⁹ Ngikhulula ezitheni zami, Nkosi; ngiphephele kuwe.

¹⁰ Ngifundisa ukwenza intando yakho, ngoba wena unguNkulunkulu wami. Umoya wakho omuhle kawungihole endleleni enhle.

¹¹ Nkosi, ngisiza ngenxa yebizo lakho. Ngokulunga kwakho ungikhuphe ekuhluphekeni;

¹² ngothando lwakho olungapheliyo uzichithe izitha zami, ubhubhise bonke abamelana lami, ngoba ngiyinceku yakho.