AmaHubo 140 - iBhayibhili Elingcwele 1978

Umkhuleko wokucela ukulondolozwa

¹ Ngikhulula, Nkosi, ebantwini ababi, ungilondoloze ebantwini abalesihluku,

² abaceba okubi enhliziyweni zabo, abavusa ingxabano njalonjalo.

³ Balola inlimi zabo zibe bukhali njengezenyoka, endebeni zabo kulobuhlungu bamabululu.

⁴ Ngivikela, Nkosi, ezandleni zababi, ungilondoloze ebantwini abalesihluku abaceba ukukhuba inyawo zami.

⁵ Abantu abazigqajayo bangithiyile ngomjibila, bendlala imbule labo; bangithiya eceleni kwendlela.

⁶ Ngithi eNkosini: Wena unguNkulunkulu wami. Zwana ilizwi lokunxusa kwami, Nkosi.

⁷ Nkosi, Nkosi yami, mkhululi wami olamandla, uvikele ikhanda lami osukwini lokulwa.

⁸ Ungazivumeli, Nkosi, izifiso zababi, ungawaphumelelisi amacebo abo.

⁹ Labo abangihanqileyo kabangangahluli; kabubuyele kibo ububi bomlomo wabo.

¹⁰ Amalahle atshisayo awele phezu kwabo, bawiselwe emgodini, bangaphindi bavuke.

¹¹ Abahlebayo kabangabi landawo elizweni; ububi kabumzingele abulawe olesihluku.

¹² Ngiyazi ukuthi iNkosi iyayimela indaba yohluphekayo, iyabenzela ukulunga abayanga.

¹³ Impela abalungileyo bazalidumisa ibizo lakho; labaqotho bazakuhlala phambi kwakho.