AmaHubo 139 - iBhayibhili Elingcwele 1978

INkosi iyazi konke, ikhona ezindaweni zonke

¹ Nkosi, ungihlolile, uyangazi.

² Uyakwazi ukuhlala kwami lokusuka kwami; uyayazi imicabango yami ukhatshana.

³ Uyahlola ukuhamba kwami lokulala kwami, uyazazi indlela zami zonke.

⁴ Ngingakakhulumi ilizwi ngomlomo wami, Nkosi, usulazi wena.

⁵ Ungizingelezile emuva langaphambili, ngesandla sakho uyangivikela.

⁶ Ukwazi okunje kuyangimangalisa; kuphakeme, ngingeke ngifinyelele kukho.

⁷ Ngizakuya ngaphi ngisuke emoyeni wakho na? Ngizabalekela ngaphi ngisuke ebusweni bakho na?

⁸ Uba ngisenyukela ezulwini, wena ukhona lapho; uba ngisendlala icansi lami endaweni yabafileyo, wena ulapho.

⁹ Uba ngiphaphela empumalanga, loba ngiyehlala entshonalanga,

¹⁰ lalapho isandla sakho sizakungihola, lesokunene sakho singibambe.

¹¹ Uba ngisithi: Umnyama kawungifihle, lokukhanya kube yibusuku kimi;

¹² umnyama kawumnyama kuwe, ubusuku bukhanya njengemini; ngoba umnyama uyafana lokukhanya kuwe.

¹³ Ngoba wena wayenza imibilini yami, wangibumba ngisesiswini sikamama,

¹⁴ Ngiyakubonga, ngoba wena uyesabeka; imisebenzi yakho iyamangalisa. Wena uyangazi kuhle;

¹⁵ amathambo ami ayengafihlekanga kuwe, lapho ngangisenziwa ekusithekeni, ngibunjwa ezindaweni ezizikileyo zomhlaba.

¹⁶ Amehlo akho angibona ngingakabunjwa; zonke inzuku zami zalotshwa ogwalweni lwakho; zalotshelwa mina zingakenziwa, zingakabi khona lokuba khona.

¹⁷ Imicabango yakho, Nkulunkulu, inzima kimi; bukhulu kangaka ubunengi bayo!

¹⁸ Uba ngingayibala, minengi kuletshebetshebe. Lapho ngivukayo, ngilokhu ngilawe.

¹⁹ Kungathi ungababulala ababi, Nkulunkulu! Kungathi abantu begazi bangasuka kimi;

²⁰ abantu abakuhlambazayo, bekuvukela wena!

²¹ Kangibazondi yini abakuzondayo wena, Nkosi, na? Kanginengwa yibo yini abakuvukelayo wena na?

²² Ngiyabazonda ngenzondo epheleleyo; ngithi bayizitha zami.

²³ Ngihlola, Nkulunkulu, uyazi inhliziyo yami; ngilinga, uyazi imicabango yami,

²⁴ ubone ukuba ikhona indlela embi kimi yini, ungihole endleleni engapheliyo.