AmaHubo 132 - iBhayibhili Elingcwele 1978

Isithembiso sikaDavida lesithembiso seNkosi

¹ Nkosi, mkhumbule uDavida ngezinhlupheko zakhe zonke azihluphekayo,

² ukuthi wafunga eNkosini, wenza isithembiso kuSomandla kaJakobe,

³ wathi: Kangiyikungena endlini yami, loba ngilale embhedeni wami;

⁴ kangiyikunika amehlo ami ubuthongo, lezinkophe zami ukuphumula,

⁵ ngize ngiyizuzele indawo iNkosi, indawo yokuhlala uSomandla kaJakobe.

⁶ Khangela, sezwa ngomtshokotsho wesivumelwano eEfratha, sawufumana elizweni laseJari.

⁷ Asiyeni endlini yeNkosi, sikhonze phambi kwayo.

⁸ Vuka, Nkosi, uye endaweni yakho yokuphumula, wena lomtshokotsho wamandla akho!

⁹ Abapristi bakho kabambathe ukulunga, labangcwele bakho bathabe kakhulu.

¹⁰ Ngenxa yenceku yakho uDavida ungafulatheli ogcotshiweyo wakho.

¹¹ INkosi yafunga kuDavida ngeqiniso, kayiyikusaphula isifungo sayo; yathi: Enye yamadodana akho ngizakuyibeka esihlalweni sakho sobukhosi.

¹² Uba abantwana bakho begcina isivumelwano sami lemilayo yami engizakubafundisa yona, labantwana babo bazakuhlala esihlalweni sakho sobukhosi kuze kube nininini.

¹³ Ngoba iNkosi ilikhethile iZiyone, yalithanda ukuba libe yindawo yayo yokuhlala.

¹⁴ Yathi: Le yindawo yami yokuhlala kuze kube nininini; ngizakuhlala khona, ngoba ngiyikhethile.

¹⁵ Ngizakwandisa ukudla kwalo, ngisuthise abayanga balo.

¹⁶ Abapristi balo ngizakubembesa ngokukhulula, labangcwele balo bazakuthaba kakhulu.

¹⁷ Lapho ngizakuvusa usendo lukaDavida; ngilungisele ogcotshiweyo wami isibane.

¹⁸ Izitha zakhe ngizakuzithela ihlazo, kodwa umqhele wakhe wobukhosi uzakukhazimula ekhanda lakhe.