AmaHubo 119 - iBhayibhili Elingcwele 1978

Umlayo kaNkulunkulu

¹ Babusisiwe abandlela zabo ziqotho, abahamba ngomlayo weNkosi.

² Babusisiwe abagcina imilayo yayo, abayidingayo ngenhliziyo yonke,

³ abangenzi ukungalungi, kodwa behamba endleleni zayo.

⁴ Wena usilayile ukuba sigcine kakhulu imithetho yakho.

⁵ Kungathi zingaqondiswa indlela zami ukuba ngigcine izimiso zakho!

⁶ Ng’khona ngingayikuyangeka, ngikhumbule yonke imithetho yakho.

⁷ Ngizakukudumisa ngenhliziyo eqotho, lapho ngifunda izahlulelo zakho ezilungileyo.

⁸ Ngizakugcina izimiso zakho. Ungangitshiyi impela.

⁹ Insizwa ingayigcina kanjani indlela yayo ihlambulukile na? Ngokuqaphela okwelizwi lakho.

¹⁰ Ngikudingile ngenhliziyo yami yonke; kangingaphambuki emithethweni yakho.

¹¹ Ilizwi lakho ngilibekile enhliziyweni yami, ukuze ngingoni kuwe.

¹² Kawudunyiswe wena, Nkosi; ungifundise izimiso zakho.

¹³ Ngomlomo wami ngimemezele zonke izahlulelo zomlomo wakho.

¹⁴ Ngithokoza kakhulu ngendlela yemilayo yakho kulemfuyo.

¹⁵ Ngizakunakana ngemithetho yakho, ngikhumbule indlela zakho.

¹⁶ Ngizakuthokoza ngezimiso zakho; kangiyikukhohlwa ilizwi lakho.

¹⁷ Yenzela inceku yakho okuhle, ukuba ngiphile ngigcine ilizwi lakho.

¹⁸ Vula amehlo ami ukuba ngibone izimangaliso ezivela emlayweni wakho.

¹⁹ Ngiyisihambi emhlabeni; ungangifihleli imithetho yakho.

²⁰ Umphefumulo wami uyalangatha kakhulu izahlulelo zakho ngezikhathi zonke.

²¹ Uyakhuza abaziqakisayo, baqalekisiwe abaduha emithethweni yakho.

²² Susa kimi ukweyisa lokudelela kwabo, ngoba ngigcinile limilayo yakho.

²³ Loba izikhulu zihlezi zisenza icebo ngami, kodwa inceku yakho izakunakana ngezimiso zakho.

²⁴ Imilayo yakho iyintokozo yami, ingabeluleki bami.

²⁵ Ngiwele phansi othulini nginqotshiwe; ngivuselela ngokwelizwi lakho.

²⁶ Ngakulandisela indlela zami, wena wangiphendula. Ngifundisa izimiso zakho.

²⁷ Ngichasisela indlela yemithetho yakho, ngizakunakana ngezenzo zakho ezimangalisayo.

²⁸ Umphefumulo wami uyaphela amandla ngenxa yosizi; ngiqinisa ngokwelizwi lakho.

²⁹ Susa kimi indlela yamanga, ungifundise ngomusa umlayo wakho.

³⁰ Ngikhethile indlela yobuqotho, ngibekile phambi kwami izahlulelo zakho.

³¹ Nginamathele emilayweni yakho, Nkosi; kangingayangeki.

³² Ngizagijima endleleni yemithetho yakho, ngoba uzakhulisa ukuqedisisa kwami.

³³ Nkosi, ngifundisa indlela yezimiso zakho, ngizakuyigcina kuze kube sekupheleni.

³⁴ Ngiphe ukuqedisisa ukuze ngigcine umlayo wakho, ngiwulondoloze ngenhliziyo yami yonke.

³⁵ Ngihambisa endleleni yemithetho yakho, ngoba ngiyathokoza ngayo,

³⁶ Qondisa inhliziyo yami emilayweni yakho, kungabi semhawini.

³⁷ Phendula amehlo ami ukuba angaboni okuyize; ungivuselele endleleni zakho.

³⁸ Qinisa isithembiso sakho encekwini yakho esingesabo abakwesabayo.

³⁹ Susa isigcono engisesabayo, ngoba izahlulelo zakho zilungile.

⁴⁰ Khangela, ngiyalangatha imithetho yakho; ngivuselela ngokulunga kwakho.

⁴¹ Kaluze kimi uthando lwakho olungapheliyo, Nkosi, ukukhulula kwakho ngokwelizwi lakho.

⁴² Ng’khona ngizakubaphendula abangithukayo, ngoba ngiyathemba ilizwi lakho.

⁴³ Ungakususi emlonyeni wami ukukhuluma iqiniso, ngoba ngithemba izahlulelo zakho.

⁴⁴ Ngizakuwugcina umlayo wakho njalonjalo, kuze kube nininini;

⁴⁵ ngizahamba ngokukhululeka, ngoba ngiyifundile imithetho yakho.

⁴⁶ Ngizakukhuluma ngemilayo yakho phambi kwamakhosi, ngingayangeki;

⁴⁷ ngoba ngithokoza ngemithetho yakho engiyithandayo.

⁴⁸ Ngihlonipha imithetho yakho engiyithandayo, nginakane ngezimiso zakho.

⁴⁹ Khumbula ilizwi lakho encekwini yakho, owanginika ithemba ngalo.

⁵⁰ Induduzo yami ekuhluphekeni kwami yilokhu ukuthi ilizwi lakho liyangivuselela.

⁵¹ Abaziqakisayo bangihleka ulunya, kodwa kangiphambuki emlayweni wakho.

⁵² Lapho ngicabanga ngezahlulelo zakho zasendulo ngiyaduduzeka, Nkosi.

⁵³ Ngiyathukuthela kakhulu ngenxa yababi abatshiya umlayo wakho.

⁵⁴ Izimiso zakho zaba zingoma zami endlini engithe cosololo kuyo.

⁵⁵ Ebusuku ngikhumbula ibizo lakho, Nkosi, ngigcine umlayo wakho.

⁵⁶ Lesisibusiso ngesami sokuba ngigcinile imithetho yakho.

⁵⁷ Nkosi, uyisabelo sami; ngithi ngizakugcina amazwi akho.

⁵⁸ Ngiyancenga umusa wakho ngenhliziyo yami yonke; woba lomusa kimi ngokwelizwi lakho.

⁵⁹ Lapho ngicabanga ngendlela zakho, ngiqondisa inyawo zami emilayweni yakho.

⁶⁰ Ngiyaphangisa, kangilibali ukugcina imithetho yakho.

⁶¹ Ababi bangithiyile, kodwa kangikhohlwa umlayo wakho.

⁶² Phakathi kobusuku ngizakuvuka ukuba ngikubonge ngenxa yezahlulelo zakho ezilungileyo.

⁶³ Ngingumngane wabo bonke abakwesabayo, abagcina imithetho yakho.

⁶⁴ Nkosi, umhlaba wonke ugcwele uthando lwakho olungapheliyo; ngifundisa izimiso zakho.

⁶⁵ Wenzele inceku yakho okuhle, Nkosi, ngokwelizwi lakho.

⁶⁶ Ngifundisa ukwahlulela okuhle lokwazi, ngoba ngikholwa imithetho yakho.

⁶⁷ Ngingakahlupheki ngaduha, kodwa khathesi sengigcine ilizwi lakho.

⁶⁸ Wena ulungile, wenza okulungileyo; ngifundisa izimiso zakho.

⁶⁹ Abaziqakisayo baqamba amanga ngami, kodwa ngayo yonke inhliziyo yami ngiyagcina imithetho yakho;

⁷⁰ kabalakuqedisisa, kodwa mina ngithokoza ngomlayo wakho.

⁷¹ Kwakungilungele ukuba ngihlutshwe, ukuze ngifunde izimiso zakho.

⁷² Umlayo owumisileyo muhle kimi kulezinhlamvu eziyizinkulungwane zegolide lezesiliva.

⁷³ Izandla zakho zingenzile, zangibumba; nginika ukuqedisisa ukuba ngifunde imithetho yakho.

⁷⁴ Abakwesabayo bazakuthokoza lapho bengibona, ngoba ngithembile elizwini lakho.

⁷⁵ Nkosi, ngiyazi ukuthi izahlulelo zakho zilungile, lokuthi ukungitshaya kwakho kulungile.

⁷⁶ Uthando lwakho olungapheliyo kalube yinduduzo yami njengokuthembisa kwakho encekwini yakho.

⁷⁷ Isihawu sakho kasize kimi ukuba ngiphile, ngoba umlayo wakho uyintokozo yami.

⁷⁸ Abaziqakisayo kabayangeke, ngoba bangiqambela amanga; kodwa mina ngizakunakana ngemithetho yakho.

⁷⁹ Kabaphendukele kimi abakwesabayo, abazi imilayo yakho.

⁸⁰ Inhliziyo yami kayiphelele ezimisweni zakho, ukuze ngingayangeki.

⁸¹ Umphefumulo wami uyalangatha ukukhulula kwakho; ngiyathemba ilizwi lakho.

⁸² Amehlo ami ayafiphala ngokulindela ilizwi lakho; ngithi: Uzakungiduduza nini na?

⁸³ Ngoba sengitshwabhene njengomgodla osentuthwini, kanti kangikhohlwa izimiso zakho.

⁸⁴ Ngizalinda insuku ezingaki na? Uzakubahlulela nini abangizingelayo na?

⁸⁵ Abaziqakisayo bangimbela imigodi, abangahambiyo ngokomlayo wakho.

⁸⁶ Yonke imithetho yakho ithembekile; bangizingela ngamanga; ngisiza!

⁸⁷ Baphosa ukungibulala emhlabeni, kodwa kangitshiyanga imithetho yakho.

⁸⁸ Ngivuselela ngothando lwakho olungapheliyo, ukuze ngigcine imilayo yakho.

⁸⁹ Nkosi, ilizwi lakho limi ezulwini kuze kube nininini.

⁹⁰ Ukuthembeka kwakho kusezizukulwaneni zonke; wamisa umhlaba, usemi.

⁹¹ Ngokumisa kwakho konke kusemi lalamuhla, ngoba izinto zonke ziyizinceku zakho.

⁹² Uba umlayo wakho ubungesiyo intokozo yami, ngabe ngibhubhele ekuhluphekeni kwami.

⁹³ Kangisoze ngikhohlwe imithetho yakho, ngoba wangivuselela ngayo.

⁹⁴ Ngingowakho, ungisize; ngoba ngidingile imithetho yakho.

⁹⁵ Ababi bangilindele ukungibhubhisa, kodwa ngiyananzelela imilayo yakho.

⁹⁶ Ngiyazi ukuthi zonke izinto zilokuphela, kodwa umlayo wakho kawulamkhawulo.

⁹⁷ Ngiyawuthanda umlayo wakho kangaka. Usuku lonke ngiyanakana ngawo.

⁹⁸ Ngemithetho yakho ngiyahlakanipha kulezitha zami, ngoba ilami kuze kube nininini.

⁹⁹ Ngilokuqedisisa kulabo bonke abafundisi bami, ngoba nginakana ngemilayo yakho.

¹⁰⁰ Ngilokuqedisisa kulabadala, ngoba ngigcina imithetho yakho.

¹⁰¹ Ngiyazinqanda inyawo zami endleleni zonke ezimbi, ukuze ngigcine ilizwi lakho.

¹⁰² Kangiphambuki kuzo izahlulelo zakho, ngoba wena wangifundisa.

¹⁰³ Amnandi kangaka amazwi akho emlonyeni wami, amnandi kulenyosi!

¹⁰⁴ Ngayo imithetho yakho ngiyazuza ukuqedisisa; ngakho ngiyazonda zonke indlela zamanga.

¹⁰⁵ Ilizwi lakho liyisibane enyaweni zami lokukhanya endleleni yami.

¹⁰⁶ Ngifungile, ngaqinisa, ukugcina izimiso zakho ezilungileyo.

¹⁰⁷ Ngiyahlupheka kakhulu; ngivuselela, Nkosi, ngokwelizwi lakho.

¹⁰⁸ Nkosi, yamukela iminikelo yami yokubonga, ungifundise izahlulelo zakho.

¹⁰⁹ Ngingenisa ukuphila kwami engozini njalonjalo, kodwa kangikhohlwa umlayo wakho.

¹¹⁰ Ababi bangithiyile, kodwa kangiduhanga emithethweni yakho.

¹¹¹ Imilayo yakho iyilifa lami kuze kube nininini; iyintokozo yenhliziyo yami.

¹¹² Ngizimisele ukugcina izimiso zakho kuze kube sekupheleni.

¹¹³ Ngiyabazonda abanhliziyombili, kodwa umlayo wakho ngiyawuthanda.

¹¹⁴ Wena uyisiphephelo sami lesihlangu sami; ngiyathemba elizwini lakho.

¹¹⁵ Sukani kimi lina abenza okubi, ukuba ngigcine imithetho kaNkulunkulu wami.

¹¹⁶ Ngisekela ngokwelizwi lakho ukuze ngiphile, ngingayangeki ngethemba lami.

¹¹⁷ Ngiqinisa ukuba ngiphile, nginanzelele njalo izimiso zakho.

¹¹⁸ Bonke abaduha ezimisweni zakho uyabalahla, ubuqili babo buyize.

¹¹⁹ Uyalahla bonke ababi bomhlaba njengamanyele; ngakho ngiyayithanda imilayo yakho.

¹²⁰ Umzimba wami uyathuthumela ulovalo ngawe, ngiyesaba izahlulelo zakho.

¹²¹ Ngenzile okulungileyo lokufaneleyo; ungangiyekeleli kubo abangihluphayo.

¹²² Mela inceku yakho ngokulunga, abaziqakisayo kabangangicindezeli.

¹²³ Amehlo ami ayafiphala ngokulinda ukukhulula kwakho, ukugcwaliswa kwesithembiso sakho esilungileyo.

¹²⁴ Yenza encekwini yakho ngokothando lwakho olungapheliyo, ungifundise izimiso zakho.

¹²⁵ Ngiyinceku yakho; ngiphe ukuqedisisa, ukuba ngiyazi imilayo yakho.

¹²⁶ Sekuyisikhathi seNkosi sokuba isebenze, ngoba abantu bawaphule umlayo wakho.

¹²⁷ Ngakhoke ngiyayithanda imithetho yakho kakhulu kulegolide, yebo, kulegolide elihle.

¹²⁸ Ngakho ngiyaqondisa inyawo zami ngokwemithetho yakho yonke, ngiyazonda zonke indlela zamanga.

¹²⁹ Imilayo yakho iyamangalisa; ngakhoke umphefumulo wami uyayigcina.

¹³⁰ Ukwambulwa kwamazwi akho kuyakhanyisa, kuyahlakaniphisa abayizithutha.

¹³¹ Ngiyavula umlomo wami, ngiyaphefuzela, ngoba ngilangatha imithetho yakho.

¹³² Phendukela kimi, ube lomusa kimi njengokwenza kwakho kwabathanda ibizo lakho.

¹³³ Qinisa izinyathelo zami ngokwelizwi lakho, kabungabusi phezu kwami ububi.

¹³⁴ Ngikhulula ekucindezeleni kwabantu, ukuze ngigcine imithetho yakho.

¹³⁵ Khanyisa ubuso bakho phezu kwenceku yakho, ungifundise izimiso zakho.

¹³⁶ Amehlo ami ehlisa inyembezi ezinengi, ngoba abantu kabagcini umlayo wakho.

¹³⁷ Wena, Nkosi, ulungile, ziqondile izahlulelo zakho.

¹³⁸ Imilayo yakho oyimisileyo ilungile, ithembekile.

¹³⁹ Ukutshiseka kwami kuyangidla, lapho izitha zami zikhohlwa amazwi akho.

¹⁴⁰ Ilizwi lakho lihlambulukile, liqinile; ngakho inceku yakho iyalithanda.

¹⁴¹ Mina ngimncinyane, ngidelelekile, kodwa imithetho yakho kangiyikhohlwa.

¹⁴² Ukulunga kwakho kuyikulunga okumiyo njalonjalo, lomlayo wakho uliqiniso.

¹⁴³ Ukuhlupheka lokubandezeka kwehlele phezu kwami, kodwa imithetho yakho iyintokozo yami.

¹⁴⁴ Imilayo yakho ilungile kuze kube nininini; ngiphe ukuqedisisa ukuba ngiphile.

¹⁴⁵ Ngiyakhala ngenhliziyo yami yonke; ngiphendula, Nkosi. Ngizakugcina izimiso zakho.

¹⁴⁶ Ngiyakhala kuwe; ngisize, ukuba ngigcine imilayo yakho.

¹⁴⁷ Ngiyavuka kungakasi ukuba ngikhulekele ukusizwa; ngiyathemba emazwini akho.

¹⁴⁸ Ngiyaphaphama ebusuku singakapheli isikhathi sokulinda, ukuba nginakane ngelizwi lakho.

¹⁴⁹ Zwana ilizwi lami ngothando lwakho olungapheliyo; Nkosi, ngivuselela ngokwezahlulelo zakho.

¹⁵⁰ Bayasondela abangihlupha ngolunya, bakhatshana lomlayo wakho.

¹⁵¹ Kodwa wena, Nkosi useduze, lemithetho yakho yonke iliqiniso.

¹⁵² Sekukade ngisazi ngemilayo yakho ukuthi uyisekele imi kuze kube nininini.

¹⁵³ Khangela ukuhlupheka kwami, ungikhulule, ngoba kangiwukhohlwa umlayo wakho.

¹⁵⁴ Mela indaba yami, ungihlenge; ngivuselela ngokwelizwi lakho.

¹⁵⁵ Ukukhululwa kukhatshana lababi, ngoba kabafuni izimiso zakho.

¹⁵⁶ Isihawu sakho, Nkosi, sikhulu; ngivuselela ngokwezahlulelo zakho.

¹⁵⁷ Banengi abangizingelayo labayizitha zami, kodwa kangiphambuki emilayweni yakho.

¹⁵⁸ Lapho ngibona abenza okubi ngiyacunuka, ngoba kabagcini imithetho yakho.

¹⁵⁹ Khumbula ukuthi ngiyithanda kangaka imithetho yakho. Ngivuselela ngokothando lwakho olungapheliyo.

¹⁶⁰ Wonke amazwi akho aliqiniso, zonke izahlulelo zakho ezilungileyo zimi kuze kube nininini.

¹⁶¹ Izikhulu zingizingela ngingelacala; kodwa inhliziyo yami iyahlonipha amazwi akho.

¹⁶² Ngiyathokoza ngelizwi lakho njengomuntu othole impango enkulu.

¹⁶³ Amanga ngiyawazonda ngiyawenyanya, kodwa umlayo wakho ngiyawuthanda.

¹⁶⁴ Ngiyakudumisa kasikhombisa ngosuku ngenxa yezahlulelo zakho ezilungileyo.

¹⁶⁵ Abathanda umlayo wakho balokuthula okukhulu; kakukho okubakhubekisayo.

¹⁶⁶ Ngiyathembela ekukhululeni kwakho, Nkosi, ngiyenza imithetho yakho.

¹⁶⁷ Umphefumulo wami uyagcina imilayo yakho, ngiyayithanda kakhulu.

¹⁶⁸ Ngiyagcina imithetho yakho lemilayo yakho, ngoba zonke indlela zami ziphambi kwakho.

¹⁶⁹ Ukukhala kwami kakuzwakale kuwe, Nkosi; ngiphe ukuqedisisa ngokwelizwi lakho.

¹⁷⁰ Ukunxusa kwami kakufike phambi kwakho; ngikhulula ngokwelizwi lakho.

¹⁷¹ Umlomo wami uzakukudumisa, ngoba ungifundisa izimiso zakho.

¹⁷² Ulimi lwami luzakuhlabelela ngelizwi lakho, ngoba yonke imithetho yakho ilungile.

¹⁷³ Isandla sakho kasilungele ukungisiza, ngoba ngikhethile imithetho yakho.

¹⁷⁴ Ngiyalangatha ukukhulula kwakho, Nkosi, umlayo wakho uyintokozo yami.

¹⁷⁵ Kangiphile ukuba ngikudumise, lezahlulelo zakho kazingisize.

¹⁷⁶ Ngiduhile njengemvu elahlekileyo; dinga inceku yakho, ngoba kangikhohlwa imithetho yakho.