AmaHubo 118 - iBhayibhili Elingcwele 1978

Ukubonga iNkosi ngokukhulula kwayo

¹ Bongani iNkosi, ngoba ilungile; uthando lwayo olungapheliyo lumi kuze kube nininini.

² Katsho uIsrayeli athi: Uthando lwayo olungapheliyo lumi kuze kube nininini.

³ Kayitsho indlu kaAroni ithi: Uthando lwayo olungapheliyo lumi kuze kube nininini.

⁴ Kabatsho abayesabayo iNkosi bathi: Uthando lwayo olungapheliyo lumi kuze kube nininini.

⁵ Osizini lwami ngakhuleka eNkosini; iNkosi yangiphendula yangikhulula.

⁶ INkosi ingakimi, kangiyikwesaba; umuntu angenzani kimi na?

⁷ INkosi ingakimi ukungisiza; ngizakubona engikufisayo ngalabo abangizondayo.

⁸ Kuhle ukuphephela eNkosini kulokuthemba umuntu.

⁹ Kuhle ukuphephela eNkosini kulokuthemba izikhulu.

¹⁰ Zonke izizwe zangihanqa; ebizweni leNkosi ngazichitha.

¹¹ Zangihanqa inxa zonke; ebizweni leNkosi ngazichitha.

¹² Zangihanqa njengenyosi, zavutha njengomlilo wameva; ebizweni leNkosi ngazichitha.

¹³ Zangihlasela ngamandla, ngaze ngaphos’ ukuwa; kodwa iNkosi yangisiza.

¹⁴ INkosi ingamandla ami lengoma yami, ingumkhululi wami.

¹⁵ Lalelani ingoma zokuthokoza lezokunqoba emathenteni abalungileyo besithi: Esokunene seNkosi siyanqoba,

¹⁶ esokunene seNkosi siphakanyisiwe, esokunene seNkosi siyanqoba.

¹⁷ Kangiyikufa, kodwa ngizakuphila, ngilandise izenzo zeNkosi.

¹⁸ INkosi ingitshayile kakhulu, kodwa kayinginikelanga ekufeni.

¹⁹ Ngivulelani amasango okulunga ukuba ngingene kuwo, ngibonge iNkosi.

²⁰ Yileli isango leNkosi; abalungileyo bazakungena ngalo.

²¹ Ngiyakubonga ngoba ungiphendule, waba ngumkhululi wami.

²² Ilitshe elaliwa ngabakhi seliyinhloko yengonsi.

²³ Lokhu kwenziwa yiNkosi, kuyamangalisa emehlweni ethu.

²⁴ Lolu lusuku olumiswe yiNkosi, asithabe sithokoze kulo.

²⁵ Sikhulule, siyakuncenga, Nkosi; Nkosi, siyakuncenga sinike impumelelo.

²⁶ Ubusisiwe yena ongena ngebizo leNkosi. Siyalibusisa sisendlini yeNkosi.

²⁷ INkosi inguNkulunkulu, yona isinikile ukukhanya. Qalisani ukugida, lizunguze ingatsha, libhode ialtare.

²⁸ Wena unguNkulunkulu wami, ngizakukubonga; wena unguNkulunkulu wami, ngizakukudumisa.

²⁹ Bongani iNkosi, ngoba ilungile; ngoba uthando lwayo olungapheliyo lumi kuze kube nininini.