AmaHubo 111 - iBhayibhili Elingcwele 1978

INkosi ifanele ukubongwa

¹ Dumisani iNkosi! Ngiyayibonga iNkosi ngenhliziyo yami yonke emhlanganweni lasebandleni labaqotho.

² Mikhulu imisebenzi yeNkosi, labo abayithandayo bayayifunda.

³ Umsebenzi wayo ulodumo lobukhosi, lokulunga kwayo kuhlala kuze kube nininini.

⁴ Yenzile ukuba imisebenzi yayo emangalisayo ikhunjulwe; iNkosi ilomusa lesihawu.

⁵ Iyabapha ukudla labo abayesabayo; iyakhumbula njalo isivumelwano sayo.

⁶ Ibatshengisile abantu bayo amandla emisebenzini yayo ngokubanika ilizwe lezizwe.

⁷ Imisebenzi yezandla zayo iqotho ilungile; lemithetho yayo yonke ithembekile,

⁸ imisiwe kuze kube nininini, yenziwa ngeqiniso langobuqotho.

⁹ Yabakhulula abantu bayo; yamisa isivumelwano sayo kuze kube nininini; lingcwele liyesabeka ibizo layo.

¹⁰ Ukuyesaba iNkosi kuyikuqala kokuhlakanipha; balengqondo enhle bonke abalakho. Ukudunyiswa kwayo kumi kuze kube nini lanini.