AmaHubo 109 - iBhayibhili Elingcwele 1978

Umkhulelo wokucela impindiselo

¹ Ungathuli, Nkulunkulu engikubongayo.

² Ngoba ababi labakhohlisayo bakhuluma ngami, bengiqambela amanga.

³ Bangihanqa ngamazwi enzondo, bengihlasela ngingelacala.

⁴ Ngithi lapho ngibathanda bona bangizonde, lalapho ngibakhulekela.

⁵ Ngakho bangibuyisela okubi ngokuhle, lenzondo ngothando lwami.

⁶ Umvusele lowo ozakumfumana elecala omelana laye ammangalele.

⁷ Ekuthonisisweni kwakhe kalahlwe licala; lomkhuleko wakhe ube yisono;

⁸ insuku zakhe zibe lutshwana, omunye athathe isikhundla sakhe.

⁹ Abantwana bakhe kababe yizintandane, lomkakhe abe ngumfelwakazi.

¹⁰ Abantwana bakhe kabazulazule bephanza, baxotshwe emanxiweni abahlala kuwo.

¹¹ Labo aboleka kibo bamthathele konke alakho, labezizweni baphange izithelo zomsebenzi wakhe,

¹² kungabi khona omenzela umusa, futhi kungabi khona ozwela abantwana bakhe isihawu.

¹³ Inzalo yakhe kayiphele, lebizo lakhe lesulwe esizukulwaneni esilandelayo.

¹⁴ Ububi babokhokho bakhe bukhunjulwe phambi kweNkosi, kuthi isono sikanina singasuswa.

¹⁵ Kabube phambi kweNkosi kokuphela; kakuphele ukukhunjulwa kwakhe emhlabeni;

¹⁶ ngoba wayengakhumbuli ukwenza umusa, kodwa wazingela umuntu ohluphekayo longumyanga lodabukileyo enhliziyweni ukubabulala.

¹⁷ Wathanda ukuthuka; ukuthuka kakwehlele phezu kwakhe; wayengathandi ukubusisa; ngakho kakuhlale khatshana laye.

¹⁸ Wagqoka ukuthuka njengesigqoko; kakuzike emzimbeni wakhe njengamanzi lanjengamafutha emathanjeni akhe;

¹⁹ kakube njengengubo azembesa ngayo, kube njengebhanti azibopha ngalo insuku zonke.

²⁰ Lokhu kakube ngumvuzo wezitha zami ovela eNkosini, lowalabo abakhuluma okubi ngami.

²¹ Kodwa wena, Nkulunkulu, Nkosi yami, ngenzela mina ngokwebizo lakho; ngoba uthando lwakho olungapheliyo luhle, akungikhulule.

²² Ngoba ngiyisihlupheki lomyanga, lenhliziyo yami idabukile phakathi kwami.

²³ Ngiyedlula njengethunzi lakusihlwa; ngiphephuke njengesikhongwane.

²⁴ Amadolo ami abuthakathaka ngokuzila ukudla, lomzimba wami usucakile.

²⁵ Sengiyinhlekisa kubo abayizitha zami, lapho bengibona banikina amakhanda abo.

²⁶ Akungisize, Nkosi, Nkulunkulu wami, ungikhulule ngothando lwakho olungapheliyo,

²⁷ ukuze bazi ukuthi lokhu kuvela kuwe; wena, Nkosi, ukwenzile.

²⁸ Kabathuke bona, kodwa wena ubusise; kabayangeke abangivukelayo, kodwa inceku yakho kayithabe.

²⁹ Kabathelwe lihlazo abangivukelayo, bembeswe zinhloni njengengubo.

³⁰ Ngizakuyibonga kakhulu iNkosi ngomlomo wami; ngizakuyidumisa phakathi kwexuku.

³¹ Ngoba iyamela umyanga, ukuba imkhulule kulabo abamqumela ukufa.