AmaHubo 107 - iBhayibhili Elingcwele 1978

UGWALO LWESIHLANU Ukubonga iNkosi ngokulunga kwayo

¹ Ibongeni iNkosi, ngoba ilungile, ngoba uthando lwayo kalulakuphela.

² Kabatsho njalo abahlengiweyo beNkosi ebahlengileyo ezitheni,

³ yababutha emazweni, empumalanga lasentshonalanga, enyakatho laseningizimu.

⁴ Abanye bazula enkangala bengafumani indlela eya emzini abangahlala kuwo,

⁵ balamba boma, umphefumulo wabo waphela amandla.

⁶ Basebekhuleka eNkosini ekuhluphekeni kwabo, yabakhulula osizini lwabo;

⁷ yabahola ngendlela eqondileyo, baze bafika emzini abangahlala kuwo.

⁸ Kabayibonge iNkosi ngothando lwayo olungapheliyo langemisebenzi yayo emangalisayo ebantwaneni babantu.

⁹ Ngoba iyamkholisa owomileyo, imsuthise ngokuhle olambileyo.

¹⁰ Abanye bahlala emnyameni lasethunzini lokufa, besosozini bebotshiwe ngensimbi,

¹¹ ngoba baphambana lamazwi kaNkulunkulu, badelela iseluleko soPhezukonke.

¹² Inhliziyo zabo zadabuka ngenxa yokuhlupheka; bawa kungekho ongabasiza.

¹³ Basebekhuleka eNkosini ekuhluphekeni kwabo, yabakhulula osizini lwabo;

¹⁴ yabakhupha emnyameni lasethunzini lokufa, yaqamula izibopho zabo.

¹⁵ Kabayibonge iNkosi ngothando lwayo olungapheliyo, langemisebenzi yayo emangalisayo ebantwaneni babantu.

¹⁶ Ngoba ibulele izivalo zethusi, yaphula imigoqo yensimbi.

¹⁷ Abanye babeyizithutha, ngenxa yezono zabo langenxa yobubi babo bahlupheka;

¹⁸ benyanya ukudla konke, basondela eduze lokufa.

¹⁹ Basebekhuleka eNkosini ekuhluphekeni kwabo, yabakhulula osizini lwabo;

²⁰ yathumela ilizwi layo, yabasilisa, yabakhulula ekubhujisweni.

²¹ Kabayibonge iNkosi ngothando lwayo olungapheliyo, langemisebenzi yayo emangalisayo ebantwaneni babantu.

²² Kabanikele umnikelo wokubonga, bahlabelele izenzo zayo ngokuthaba.

²³ Abanye bahamba olwandle ngemikolo, bethengiselana emanzini amakhulu;

²⁴ babona izenzo zeNkosi, lemisebenzi yayo emangalisayo olwandle.

²⁵ Ngoba yalaya, kwavuka isiphepha somoya esavusa amavinqo olwandle.

²⁶ Baphakamela phezulu ezulwini, behlela phansi enzikini; baphelelwa yisibindi ekuhluphekeni kwabo.

²⁷ Babhadazela bedayizela njengezidakwa, kwaphela ukuhlakanipha kwabo.

²⁸ Basebekhuleka eNkosini ekuhluphekeni kwabo, yabakhulula osizini lwabo;

²⁹ yathulisa isiphepha, kwathula amavinqo olwandle.

³⁰ Basebethokoza ngoba kwasekukhona ukuthula, yabafikisa ethekwini ababesiya kulo.

³¹ Kabayibonge iNkosi ngothando lwayo olungapheliyo,

³² kabayidumise ebandleni labantu, bayidumise emhlanganweni wabadala.

³³ Iphendula imifula ibe yinkangala, imithombo yamanzi ibe ngumhlaba owomileyo,

³⁴ umhlabathi ovundileyo ube lugwadule lwetshwayi, ngenxa yobubi babahlezi khona.

³⁵ Iphendula inkangala ibe yiziziba zamanzi, lelizwe elomileyo libe yimithombo yamanzi,

³⁶ ihlalise khona abalambileyo, bakhe umuzi wokuhlala;

³⁷ balime amasimu, bagxumeke isivini, batshaye inala.

³⁸ Ngokubusisa kwayo bayanda kakhulu, lenkomo zabo kazinciphi.

³⁹ Babuya bancipha, bathotshiswa ngokucindezelwa lokuhlupheka losizi.

⁴⁰ Ithela ihlazo phezu kwezikhulu, ibazulisa enkangala engelandlela;

⁴¹ kodwa ongumyanga iyamkhupha ekuhluphekeni, ibenze abantwana bakhe bande babe njengomhlambi.

⁴² Abaqotho bayakubona lokhu bathokoze, kodwa ababi bathuliswe.

⁴³ Lowo ohlakaniphileyo kaqaphelise lokhu, aqedisise uthando olungapheliyo lweNkosi.