AmaHubo 106 - iBhayibhili Elingcwele 1978

Ukona kukaIsrayeli lokuthembeka kweNkosi

¹ Dumisani iNkosi! Ibongeni iNkosi ngoba ilungile, ngoba uthando lwayo olungapheliyo kumi kuze kube nininini.

² Ngubani ongalandisa ngezenzo zeNkosi zamandla, ayidumise ngokwaneleyo na?

³ Babusisiwe bona abenza okufaneleyo, abenza ukulunga ngazo zonke izikhathi.

⁴ Ungikhumbule, Nkosi, lapho utshengisa umusa ebantwini bakho; ungisize lapho ubakhulula,

⁵ ukuze ngibone impumelelo yabakhethiweyo bakho, ngithokoze ekuthokozeni kwesizwe sakho, ngiziqhenye kanye labantu bakho.

⁶ Sonile thina labokhokho bethu, senzile okungalunganga, sonakele.

⁷ Okhokho, lapho babeseGibithe, kabayinanzelelanga imisebenzi yakho emangalisayo; izenzo ezinengi zothando lwakho olungapheliyo; kodwa bamvukela oPhezukonke ngasoLwandle oluBomvu.

⁸ Kanti yena wabakhulula ngenxa yebizo lakhe, ukuze abonakalise amandla akhe amakhulu.

⁹ Wakhuza uLwandle oluBomvu, lwatsha; wabahambisa phakathi kwalo njengokungathi badabula enkangala.

¹⁰ Ngakho wabakhulula esandleni somufo, wabakhulula emandleni esitha.

¹¹ Amanzi asibekela izitha zabo; kakusalanga loyedwa kuzo.

¹² Basebekholwa amazwi akhe, bahlabelela kuye.

¹³ Kodwa baphanga bakhohlwa imisebenzi yakhe, kabalindelanga iseluleko sakhe.

¹⁴ Babelokukhanuka okubi enkangala, bamlinga uNkulunkulu enkangala.

¹⁵ Wabanika abakufisayo, kodwa wathumela isifo esibulalayo phakathi kwabo.

¹⁶ Kwathi lapho besiba lomhawu ngoMose ezihonqweni langoAroni ongcwele weNkosi,

¹⁷ umhlaba wavuleka wamginya uDathani, wasibekela iqembu likaAbiramu.

¹⁸ Kwavutha lomlilo eqembini labo, lelangabi laqothula abangalunganga.

¹⁹ Benza ithole eHorebe, bakhonza isithombe esibunjiweyo.

²⁰ Bamisa inkabi edla utshani esikhundleni senkazimulo kaNkulunkulu.

²¹ Bamkhohlwa uNkulunkulu, uMkhululi wabo, owayenze izinto ezinkulu eGibithe,

²² lemisebenzi emangalisayo elizweni likaHamu, lezinto ezesabekayo ngasoLwandle oluBomvu.

²³ Ngakho wathi uzakubabhubhisa, kodwa uMose okhethiweyo wakhe wabamela ukuthinta ulaka lwakhe ukuba lungababhubhisi.

²⁴ Baleya ilizwe elihle, bengasikholwa isithembiso sakhe.

²⁵ Basola besemathenteni abo, bengalaleli ilizwi leNkosi.

²⁶ Ngakhoke waselula isandla sakhe wafunga, ukuba uzakubaqeda enkangala,

²⁷ achithele inzalo yabo ezizweni, ayihlakaze emazweni.

²⁸ Bazihlanganisa labakhonza uBali wasePeyori, badla okuhlatshelwe izithombe.

²⁹ Bayithukuthelisa iNkosi ngezenzo zabo, kwavela umkhuhlane phakathi kwabo.

³⁰ Kwasekulamula uFiniyasi, umkhuhlane waphela.

³¹ Lokhu wakubalelwa njengokulunga ezizukulwaneni ngezizukulwana kuze kube nininini.

³² Bayithukuthelisa ngasemanzini aseMeriba, uMose wahlupheka ngenxa yabo;

³³ ngoba badabula umoya wakhe, waze wakhuluma ngamawala.

³⁴ Kabababhubhisanga abantu, njengokulaywa kwabo yiNkosi,

³⁵ kodwa bahlangana lezizwe, bafunda imisebenzi yazo.

³⁶ Bakhonza izithombe zazo ezaba ngumjibila kubo.

³⁷ Banikela amadodana lamadodakazi abo ezithombeni;

³⁸ bachitha igazi elingelacala, igazi lamadodana lamadodakazi abo, abanikela ngawo ezithombeni zaseKanani; ilizwe lagcwala igazi.

³⁹ Bangcola ngokunjalo ngemisebenzi yabo, benza ukuphinga ngezenzo zabo.

⁴⁰ Lwaseluvutha ulaka lweNkosi ebantwini bayo, baba yisinengiso kuyo.

⁴¹ Yabanikela ezandleni zezizwe ukuze ababazondayo bababuse.

⁴² Izitha zabo zabacindezela, baba ngaphansi kwamandla azo.

⁴³ Yabakhulula kanengi, kodwa babehlamuka ngamacebo abo, bawiswa yibubi babo.

⁴⁴ Loba kunjalo yabona ukuhlupheka kwabo, lapho isizwa ukukhala kwabo.

⁴⁵ Yakhumbula isivumelwano sayo ngenxa yabo, yaphenduka ngenxa yobukhulu bothando lwayo olungapheliyo.

⁴⁶ Yabenza ukuba bahawukelwe yibo bonke ababebathumbile.

⁴⁷ Sikhulule, Nkosi Nkulunkulu wethu, usibuthe ezizweni, ukuba sidumise ibizo lakho elingcwele, sithabe ekukudumiseni.

⁴⁸ Kayibongwe iNkosi, uNkulunkulu kaIsrayeli, kusukela endulo kuze kube nini lanini! Abantu bonke kabathi: Ameni. Dumisani iNkosi!