AmaHubo 105 - iBhayibhili Elingcwele 1978

Izi mangaliso zeNkosi eyazenzela abakoIsrayeli

¹ Bongani iNkosi, litshumayele ibizo layo, lizazise phakathi kwabantu izenzo zayo.

² Hlabelani kuyo, liyihubele amahubo, likhulume ngezenzo zayo zonke ezimangalisayo.

³ Jabulani ebizweni layo elingcwele; kazithokoze inhliziyo zabo abafuna iNkosi.

⁴ Funani iNkosi, amandla ayo, liyidinge yona njalonjalo.

⁵ Khumbulani izenzo zayo ezimangalisayo eyazenzayo, izimangaliso zayo lezahlulelo zomlomo wayo,

⁶ lina nzalo kaAbrahama inceku yayo, lina bantwana bakaJakobe abakhethiweyo bayo.

⁷ Yona iyiNkosi uNkulunkulu wethu; iyawahlulela wonke umhlaba.

⁸ Iyakhumbula isivumelwano sayo kuze kube nininini, ikhumbula ilizwi eyalitsho yaliqinisa kuzo izizukulwana eziyinkulungwane,

⁹ isivumelwano eyasenza loAbrahama, isithembiso eyasenza kuIsaka;

¹⁰ yasiqinisa kuJakobe saba yisimiso, lakuIsrayeli saba yisivumelwano esingapheliyo,

¹¹ yathi: Ngizakukunika ilizwe laseKanani libe yisabelo sakho.

¹² Obaba babeyingcosana, yebo, babebalutshwana, beyizihambi kulo;

¹³ bazula kuzizwe ngezizwe, besuka komunye umbuso besiya kwabanye abantu;

¹⁴ kodwa iNkosi kayivumelanga muntu ukubahlupha; yakhuza amakhosi ngenxa yabo,

¹⁵ isithi: Lingathinti abagcotshiweyo bami, lingoni abaprofethi bami.

¹⁶ Yathuma indlala elizweni, yaqeda ukudla konke.

¹⁷ Yathuma indoda phambi kwabo, uJosefa owathengiswa waba yisigqili.

¹⁸ Inyawo zakhe zalinyazwa yizibopho, wafakwa isongo entanyeni,

¹⁹ kwaze kwagcwaliseka ilizwi lakhe. Ilizwi leNkosi lamlinga.

²⁰ Inkosi yaseGibithe yathuma yamthukulula, umbusi wabantu wamkhulula;

²¹ yamenza waba ngumpathi wendlu yayo lenduna yemfuyo yayo yonke,

²² ukuba alaye izikhulu zayo njengokuthanda kwakhe, afundise abadala bomphakathi ukuhlakanipha.

²³ UIsrayeli wasefika eGibithe; uJakobe wahlala elizweni lakoHamu.

²⁴ INkosi yandisa kakhulu abantu bayo, yabenza baba lamandla kulezitha zabo.

²⁵ Yaphendula inhliziyo zezitha ukuba zizonde abantu bayo, ziphathe inceku zayo ngobuqili.

²⁶ Yasithuma uMose inceku yayo, loAroni ebimkhethile.

²⁷ Bazenza izibonakaliso zayo phakathi kwamaGibithe, lezimangaliso elizweni lakoHamu.

²⁸ Yathuma umnyama, ilizwe laba mnyama; kodwa amaGibithe kawalalelanga amazwi ayo.

²⁹ Yaphendula amanzi awo aba ligazi, yabhubhisa inhlanzi zawo.

³⁰ Ilizwe lawo lagcwala amaxoxo lasezindlini zamakhosi awo.

³¹ Yakhuluma, kwavela izibawu lobudununu phakathi kwelizwe lawo.

³² Yabanika imvimbi yesiqhotho, lombane wabaneka elizweni lawo.

³³ Yatshaya amavini lemikhiwa yawo, yaphula izihlahla zelizwe lawo.

³⁴ Yakhuluma, kwavela isikhongwane lezintethe ezingelakubalwa,

³⁵ ezadla yonke imibhida elizweni lawo, zaqeda izithelo zomhlabathi wawo.

³⁶ Yabulala amazibulo elizweni lawo, ingqabutho yamandla awo.

³⁷ Yasibakhupha abakoIsrayeli bephethe isiliva legolide, kwakungekho lamunye owakhubekayo phakathi kwezizwe zabo.

³⁸ IGibithe lathokoza ekuphumeni kwabo, ngoba latshaywa luvalo ngabo.

³⁹ Yandlala iyezi lokubasibekela, lomlilo wokukhanyisa ebusuku.

⁴⁰ Bacela, yabanika izagwaca, yabasuthisa ngesinkwa sasezulwini.

⁴¹ Yaqhekeza idwala, kwampompoza amanzi, ageleza enkangala njengomfula.

⁴² Ngoba yakhumbula isithembiso sayo esingwele loAbrahama inceku yayo.

⁴³ Yaphumisa abantu bayo ngokuthokoza, labakhethiweyo bayo behlabela.

⁴⁴ Yabanika amazwe abezizwe; badla izithelo zomsebenzi wabantu,

⁴⁵ ukuba bagcine izimiso zayo, bahambe ngemilayo yayo. Dumisani iNkosi!