AmaHubo 104 - iBhayibhili Elingcwele 1978

Ukudumisa uMdali wezinto zonke

¹ Bonga iNkosi, mphefumulo wami. Nkosi Nkulunkulu wami, umkhulu kakhulu. Wambethe ubukhosi lodumo,

² wambethe ukukhanya njengengubo, wena owandlala izulu njengeveli,

³ owakha izindlu zakho phezu kwamanzi, owenza amayezi abe yinkolo yakho, ohamba ngamaphiko omoya,

⁴ owenza imimoya ibe yizigijimi zakho, lomlilo lelangabi kube yizikhonzi zakho.

⁵ Wamisa umhlaba phezu kwezisekelo zawo, ukuba ungazanyazanyiswa lakanye.

⁶ Wawugubuzela ngolwandle njengengubo; amanzi asibekela izintaba.

⁷ Ekukhuzeni kwakho abaleka; ekudumeni kwakho aphangisa ukusuka.

⁸ Intaba zaphakama, izihotsha zehlela phansi endaweni owawuyimisele zona.

⁹ Wamisa umkhawulo ukuba angawudluli, ukuze angabuyi asibekele umhlaba.

¹⁰ Wenza ukuba imithombo igobhoze ezihotsheni, lamanzi ayo agelezele phakathi kwezintaba,

¹¹ inathise zonke inyamazana zeganga, lobabhemi beganga bacime ukoma kwabo.

¹² Inyoni zaphezulu zakhela emaceleni ayo, zikhala phakathi kwezingatsha.

¹³ Uthelela izintaba ngamanzi avela endlini yakho ephezulu; umhlaba ugcwala izithelo zemisebenzi yakho.

¹⁴ Umilisela inkomo utshani, uhlumise imibhida ukuba umuntu ayilime, ukuze azuze ukudla emhlabathini,

¹⁵ lewayini elithokozisa inhliziyo, lamagcobo ajabulisayo, lesinkwa sokumqinisa.

¹⁶ Izihlahla zeNkosi zithelelwa lizulu, zona ezaseLebanoni eyazihlanyelayo.

¹⁷ Inyoni zakhela kuzo; ingabuzane lilesidleke salo ezihlahleni ezinde.

¹⁸ Intaba eziphakemeyo zingezamagogo, amadwala ayisiphephelo sezimbila.

¹⁹ Wenza inyanga ukuba yahlukanise izikhathi; ilanga liyasazi isikhathi sokutshona kwalo.

²⁰ Wenza umnyama ube yibusuku, phakathi kwabo kuphume zonke inyamazana zehlathi;

²¹ izilwane ziyabhonga zizingela, zidinga ukudla kwazo kuNkulunkulu.

²² Ekuphumeni kwelanga zibuyela emuva, zilale ezikhundleni zazo.

²³ Ng’khona kuphume abantu baye emisebenzini yabo, basebenze kuze kuhlwe.

²⁴ Nkosi, minengi kangaka imisebenzi yakho! Ngokuhlakanipha uyenzile yonke; umhlaba ugcwele izidalwa zakho.

²⁵ Nantuya ulwandle olukhulu lolubanzi, okugcwele kulo izinto ezingelakubalwa, izinto eziphilayo ezincinyane lezinkulu.

²⁶ Kuhamba kulo imikolo, loLeviyathani owamenzela ukuba adlale kulo.

²⁷ Zonke lezizidalwa zikhangele kuwe, ukuba uzinike ukudla ngesikhathi esifaneleyo.

²⁸ Lapho uzinika, ziyakudla; nxa uvula isandla sakho, zisutha okuhle.

²⁹ Lapho ufihla ubuso bakho, ziyakhathazeka; nxa ususa umoya wazo, ziyafa, zibuyele othulini ezavela kulo.

³⁰ Ekuthumeni kwakho umoya wakho, ziyadalwa; uwenza umhlaba ube mutsha.

³¹ Udumo lweNkosi kalume kuze kube nininini; iNkosi kayithokoze ngemisebenzi yayo,

³² yona ekhangela umhlaba, uthuthumele, ethinta izintaba, zithunqe.

³³ Ngizakuyihubela iNkosi ngisekhona; ngizakuhlabelela uNkulunkulu wami ngisekhona.

³⁴ Ukunakana kwami kakumthokozise, ngoba ngiyathokoza ngayo iNkosi.

³⁵ Izoni kaziphele emhlabeni, kungabe kusaba khona ababi. Bonga iNkosi, mphefumulo wami. Dumisani iNkosi!