AmaHubo 103 - iBhayibhili Elingcwele 1978

Ukubonga iNkosi ngothando lwayo

¹ Ibonge iNkosi, mphefumulo wami, lakho konke okuphakathi kwami kakubonge ibizo layo elingcwele.

² Ibonge iNkosi, mphefumulo wami, ungakhohlwa yilokho ekusize ngakho,

³ yona ethethelela zonke izono zami, eyelapha zonke izifo zami,

⁴ ehlenga ukuphila kwami ekubhujisweni, engihanqa ngothando olungapheliyo langesihawu,

⁵ esuthisa ukulangatha kwami ngokuhle, ukuze ubutsha bami buhlunyeleliswe njengobokhozi.

⁶ INkosi iyabenzela ukulunga lokufaneleyo bonke abacindezelweyo.

⁷ Yamazisa uMose indlela zayo, labantu bakoIsrayeli izenzo zayo.

⁸ INkosi ilobubele lesihawu, iyaphuza ukuthukuthela, igcwele uthando olungapheliyo.

⁹ Kayiyikuthetha njalonjalo, kayiyikuhlala ithukuthele kuze kube nininini.

¹⁰ Kayisiphathi njengokufanele izono zethu, kayisiniki lowomvuzo ofanele ukungalungi kwethu.

¹¹ Ngoba njengoba amazulu ephakeme phezu komhlaba, lunjaloke lothando lwayo olungapheliyo kubo abayesabayo.

¹² Njengoba impumalanga yahlukene lentshonalanga, ngokunjaloke izisusele khatshana lathi iziphambeko zethu.

¹³ Njengoyise ehawukela abantwana bakhe, ngokunjaloke iNkosi iyabahawukela bona abayesabayo.

¹⁴ Ngoba iyakwazi ukubunjwa kwethu; iyakhumbula ukuthi siluthuli nje.

¹⁵ Umuntu yenake insuku zakhe zinjengotshani; uyakhahlela njengamaluba eganga;

¹⁶ umoya uyadlula phezu kwawo, abesenyamalala, angabe esaziwa lasendaweni yawo.

¹⁷ Kodwa uthando olungapheliyo lweNkosi lumi kuze kube nininini kubo abayesabayo, lokulunga kwayo kumi kuze kube sebantwaneni babantwana,

¹⁸ kubo abagcina isivumelwano sayo, bekhumbula imithetho yayo ukuba bayilalele.

¹⁹ INkosi imisile isihlalo sayo sobukhosi emazulwini, lombuso wayo uphezu kwakho konke.

²⁰ Ibongeni iNkosi, lina zithunywa zayo, lina maqhawe ayo elizwa ilizwi layo, lilalela ukukhuluma kwelizwi layo.

²¹ Ibongeni iNkosi, lina lonke mabandla ayo, lina zinceku zayo ezenza intando yayo.

²² Ibongeni iNkosi lina lonke misebenzi yayo, endaweni zonke zombuso wayo. Ibonge iNkosi, mphefumulo wami.