AmaHubo 102 - iBhayibhili Elingcwele 1978

Umkhuleko womuntu olosizi

¹ Nkosi, zwana umkhuleko wami, ukukhala kwami kakufinyelele kuwe.

² Ungangifihleli ubuso bakho osukwini losizi. Ngizwa, ungiphendule masinyane lapho ngikhuleka kuwe.

³ Ngoba insuku zami ziyanyamalala njengentuthu, lamathambo ami ayavutha njengesithando somlilo.

⁴ Ngitshayiwe, ngabuna njengotshani; inhliziyo yami imnyama.

⁵ Ngenxa yokububula kwami amathambo ami ayabonakala enyameni yami.

⁶ Nginjengelinqe lasenkangala, lanjengesikhova sezindawo ezidilikileyo.

⁷ Kangilali, nginjengenyoni ehlezi yodwa esicholo sendlu.

⁸ Izitha zami ziyangithuka usuku lonke, labo abangiklolodelayo bayathuka ngebizo lami.

⁹ Ngoba ngidla umlotha, ngixubanise okunathwayo kwami lezinyembezi

¹⁰ ngenxa yentukuthelo lolaka lwakho; ungiphakamisile, wangilahla.

¹¹ Insuku zami zinjengethunzi lakusihlwa, ngiyabuna njengotshani.

¹² Kodwa wena, Nkosi, uzakubusa kuze kube nininini, lebizo lakho lizakwaziwa kuzo zonke izizukulwana.

¹³ Uzakuvuka uhawukele iZiyone; sekuyisikhathi sokuliphatha ngomusa, yebo, isikhathi esimisiweyo sesifikile.

¹⁴ Ngoba izinceku zakho ziyawathanda amatshe alo, zilesihawu othulini lwalo.

¹⁵ Izizwe zizakulesaba ibizo leNkosi, lamakhosi wonke omhlaba ubukhulu bayo.

¹⁶ Ngoba iNkosi izakulakha iZiyone, ibonakale ngobukhulu bayo;

¹⁷ izakuzwa umkhuleko wabangelalutho, kayiyikudelela ukucela kwabo.

¹⁸ Lokhu kakulotshelwe isizukulwana esizayo, ukuze kuthi abantu abangakabi khona bayidumise iNkosi.

¹⁹ Ngoba ikhangele phansi isendaweni yayo engcwele, iNkosi yakhangela emhlabeni isezulwini,

²⁰ ukuba izwe ukububula kwezibotshwa, lokuba ikhulule labo abaqunyelwe ukufa;

²¹ ukuze abantu batshumayele ibizo leNkosi eZiyone, bayidumise eJerusalema,

²² lapho izizwe zibuthana kanye lemibuso ukuyikhonza iNkosi.

²³ Yanciphisa amandla ami ebutsheni bami, yaphungula insuku zami.

²⁴ Ngithi: Nkulunkulu wami, ungangithathi insuku zami zingakapheli, wena oleminyaka ehlala izizukulwana zonke.

²⁵ Endulo wawusekela umhlaba, lamazulu angumsebenzi wezandla zakho.

²⁶ Kuzakuphela lokho, kodwa wena umi njalonjalo. Kuzakuguga konke njengengubo, wena uzakukulahla njengengubo, kuphele;

²⁷ kodwa wena unguwe njalo, leminyaka yakho kayipheli.

²⁸ Abantwana bezinceku zakho bazakuhlala bevikelekile, lenzalo yabo izakuma phambi kwakho.