AmaHubo 10 - iBhayibhili Elingcwele 1978

Ukucela ukuba ababi bachithwe

¹ Nkosi, umeleni khatshana na? Ucatshelani ezikhathini zokuhlupheka kwethu na?

² Ekuzigqajeni kwabo ababi bayazingela abayanga; kababanjwe ngamacebo abawaqambileyo.

³ Ngoba omubi uyazikhukhumeza ngezifiso zenhliziyo yakhe, loyisihwaba uyayithuka ayeyise iNkosi.

⁴ Ekuzigqajeni kwakhe omubi uthi: Kangilandaba leNkosi; yonke imicabango yakhe ithi: Kakho uNkulunkulu.

⁵ Indlela zakhe ziyaphumelela izikhathi zonke; izahlulelo zakho, Nkosi, ziphakeme kakhulu kulokubona kwakhe; izitha zakhe zonke uyazidelela.

⁶ Uthi enhliziyweni yakhe: Kangizukunyikinywa; kangisoze ngehlelwa yingozi.

⁷ Umlomo wakhe ugcwele ukuthuka lenkohliso lokuhlupha; ngaphansi kolimi lwakhe kukhona ukona lokubi.

⁸ Uyacathama phakathi kwemizi, ekusithekeni ubulala abangelacala; ulamehlo amabi kubo abangelamandla.

⁹ Uyacatsha ekusithekeni njengesilwane sicatshe esikhundleni saso; ucatshela ukumbamba ongumyanga, uyabamba ongumyanga ngembule lakhe.

¹⁰ Ongelamandla uyakhothanyiswa, awiswe ngamandla akhe.

¹¹ Omubi uthi enhliziyweni yakhe: UNkulunkulu ulibele, ufihle ubuso bakhe, kasoze abone.

¹² Vuka, Nkosi! Nkulunkulu, phakamisa isandla sakho, ungabakhohlwa abahluphekayo.

¹³ Kungani ukuba omubi adelele uNkulunkulu na? Uthi enhliziyweni yakhe: Kawuyikuba landaba.

¹⁴ Uyabona wena, yebo, uyabona ukukhathazeka lenhlupheko ukuze ukubeke ezandleni zakho. Ongelamandla uyazinikela kuwe; wena ungumsizi wezintandane.

¹⁵ Qeda amandla omubi longalunganga, ubufunisise ububi bakhe ukuze bungabe busafunyanwa.

¹⁶ INkosi yinkosi kuze kube nininini; izizwe zizakubhubha emhlabeni wayo.

¹⁷ Nkosi, uzakukuzwa ukukhala kwabamnene, uzakuqinisa inhliziyo zabo, indlebe yakho uyibeke kibo,

¹⁸ ukuba wahlulele izintandane labacindezelweyo, ukuze umuntu wasemhlabeni angabe esesabeka.