AmaHebheru 9 - iBhayibhili Elingcwele 1978

Umsebenzi wobupristi wesivumelwano esidala

¹ Lesivumelwano sokuqala sasilezimiso zenkonzo lendawo engcwele yasemhlabeni.

² Ngoba kwakhiwa ithente elokuqala elibizwa ngokuthi yiNdawo engcwele, okwakukhona kulo uluthi lwesibane letafula lezinkwa ezahlukaniselwe uNkulunkulu.

³ Ngasemva kweveli lesibili kwakukhona ithente elibizwa ngokuthi yiNdawo engcwele kakhulu,

⁴ elealtare legolide lokutshisela impepha, lomtshokotsho wesivumelwano obhadwe ngegolide inxa zonke, okwakukhona kuwo inqayi yegolide elemana phakathi, lenduku kaAroni eyahlumayo, lamatshe esivumelwano;

⁵ phezu kwawo kwakukhona amakherubi enkazimulo engamele isihlalo somusa. Singekhulume kakhulu ngalezizinto khathesinje.

⁶ Sezilungisiwe lezizinto ngokunjalo, abapristi bangena njalonjalo ethenteni lokuqala besenza umsebenzi wabo wokukhonza;

⁷ kodwa kwelesibili kungena umpristi omkhulu yedwa, laye engena kanye ngomnyaka, ephethe igazi anikela ngalo ngenxa yakhe langenxa yeziphambeko zabantu.

⁸ Ngalokhu uMoya oNgcwele utshengisa ukuthi indlela yokungena endaweni engcwele kayikavuleki lapho lisekhona ithente lokuqala.

⁹ Konke lokhu kungumfanekiso walesisikhathi. Iminikelo lemihlatshelo emiswe lapho kayilamandla okwenza okhonzayo aphelele maqondana lesazela sakhe.

¹⁰ Kodwa yona imayelana lokudla lokunatha lokugeza okwezinhlobonhlobo, iyizimiso ezimayelana lomzimba nje kuze kufike isikhathi sokupheleliswa kwezinto.

Igazi likaKristu lilamandla okuhlambulula

¹¹ Kodwa lokhu uKristu esefikile, engumpristi omkhulu wezinto ezinhle esezikhona, ithente lobupristi bakhe lingelikhulu lelipheleleyo, elingenziwanga ngezandla zabantu, okuyikuthi elingesilo lalumhlaba odaliweyo.

¹² Wangena kwaba kanye kuphela endaweni engcwele engaliphethe igazi lembuzi lelamathole, kodwa ephethe igazi lakhe; ngalokho wazuza ukukhululwa okungapheliyo.

¹³ Ngoba uba igazi lezimbuzi lelezinkunzi lokufafazwa komlotha wethokazi kulamandla okuhlambulula abangcolileyo, kuze kuhlambuluke imizimba yabo,

¹⁴ kakhulu kangakanani igazi likaKristu, owazinikela kuNkulunkulu engelasici ngoMoya ongelakuphela, lizakuhlambulula izazela zethu emisebenzini efileyo, ukuze sikhonze uNkulunkulu ophilayo.

UKristu ungumlamuli wesivumelwano esitsha

¹⁵ Ngakhoke ungumlamuli wesivumelwano esitsha, kuze kuthi ngokufa okungenxa yokukhululwa eziphambekweni ezenziweyo esivumelwaneni sokuqala ababiziweyo bazuze ilifa elingapheliyo elathenjiswayo.

¹⁶ Ngoba lapho kukhona intando eyenziwayo, kufuneka ukuba kwaziwe ukufa kwalowo owayenzayo.

¹⁷ Ngoba intando isebenza kuphela ekufeni; kayilamandla lapho esekhona lowo owayenzayo.

¹⁸ Ngakhoke isivumelwano sokuqala kasimiswanga ngaphandle kwegazi.

¹⁹ Ngoba lapho isimenyezelwe imithetho yonke yomlayo nguMose ebantwini bonke, wathatha igazi lamankonyane lelembuzi kanye lamanzi loboya obubomvu lozipho, wafafaza incwadi labantu bonke,

²⁰ esithi: Leli ligazi lesivumelwano uNkulunkulu alilaya ngaso.

²¹ Ngokunjalo wafafaza futhi ithente lezitsha zonke ezisetshenziswa enkonzweni.

²² Impela kuphose zonke izinto zihlanjululwa ngegazi ngokomthetho, ngaphandle kokuchitheka kwegazi kakukho ukuthethelelwa kwezono.

²³ Ngokunjalo kwakudingeka ukuba imifanekiso yezinto zasezulwini ihlanjululwe ngalokho, kodwa izinto zasezulwini uqobo zidinga ukuhlanjululwa ngeminikelo emihle kulale.

²⁴ Ngoba uKristu kangenanga endaweni engcwele eyenziwe ngezandla, engumfanekiso waleyo eqotho, kodwa wangena ezulwini uqobo ukuba khathesi abonakale phambi kukaNkulunkulu ngenxa yethu;

²⁵ kungesikho futhi ukuba azinikele kanengi, njengalokhu umpristi omkhulu engena endaweni engcwele iminyaka ngeminyaka, ephethe igazi elingesilo elakhe;

²⁶ uba kwakunjalo wayemele ukuhlupheka kanengi selokhu kwadatshulwa umhlaba. Kodwa ubonakaliswe kanye ekupheleni kwesikhathi ukuba asuse izono ngokuzinikela kwakhe.

²⁷ Njengalokhu kumiselwe abantu ukuba bafe kanye, emva kwalokhu kufike ukuthonisiswa,

²⁸ ngokunjalo loKristu, esenikelwe kanye ukuba athwale izono zabanengi uzakubonakala ngokwesibili, engasaqondani lesono, kodwa ukuba asilise labo abamlindeleyo.