AmaHebheru 8 - iBhayibhili Elingcwele 1978

Ubupristi bukaKristu bukhulu kulalobo babaJuda

¹ Isiqokoqela salokho esikutshoyo yilesi; silaye umpristi omkhulu onjalo osewahlala ngakwesokunene sesihlalo sobukhosi soMkhulu ezulwini,

² isikhonzi endaweni engcwele lesethente eliqotho elamiswa yiNkosi kungesuye umuntu.

³ Yilowo lalowo umpristi omkhulu umiselwe ukunikela ngeminikelo lemihlatshelo; ngakhoke kuyadingeka ukuba laye lumpristi abe lakho okuthile kokunikela.

⁴ Ngoba uba ubesemhlabeni, ubengayikuba ngumpristi lakanye, ngoba bakhona abapristi abanikela umnikelo ngokomlayo.

⁵ Bakhonza endaweni engcwele engumfanekiso lesithunzi sokwasezulwini, njengoba uMose esezakwenza ithente walaywa ngokuthi: Qaphelisa ukuthi ukwenza konke ngesifanekiso owaboniswa sona entabeni.

⁶ Kodwa uKristu unikiwe inkonzo enhle kakhulu ukwedlula endala, njengalokhu engumlamuli wesivumelwano esingcono esimisiweyo ngezithembiso ezingcono.

⁷ Ngoba uba lesosivumelwano sokuqala besingasoleki, bekungayikufunwa indawo yesesibili.

⁸ Kodwa lapho ebasola, uthi kibo: Insuku ziyeza, kutsho iNkosi, lapho ngizakwenza isivumelwano esitsha lendlu kaIsrayeli lendlu kaJuda,

⁹ esingenjengesivumelwano engasenza labokhokho babo mhla ngibabamba ngesandla ukubakhupha elizweni laseGibithe, ngoba kabahlalanga esivumelwaneni sami, lami kangibananzanga, itsho iNkosi.

¹⁰ Yilesi isivumelwano engizakusenza lendlu kaIsrayeli emva kwalezonsuku, itsho iNkosi; ngizakufaka imilayo yami engqondweni zabo, ngiyilobe enhliziyweni zabo, ngibe nguNkulunkulu wabo, bona babe ngabantu bami.

¹¹ Kabasayikufundisana kube yilowo lalowo lowakibo, loba ilowo lalowo lomfowabo, ngokuthi: Yazi iNkosi. Ngoba bonke bazakungazi, kusukela komncinyane wabo kuze kufike komkhulu.

¹² Ngizakuba lesihawu ngokungalungi kwabo, lezono zabo kangisayikuzikhumbula.

¹³ Ngokukhuluma ngesivumelwano esitsha wenza esokuqala sibe ngesigugileyo; osekugugile sekukudala sekuzakunyamalala.