AmaHebheru 7 - iBhayibhili Elingcwele 1978

UKristu ungumpristi omkhulu njengoMelkizedeki

¹ UMelkizedeki lowo, inkosi yaseSalema, umpristi kaNkulunkulu oPhezukonke, wahlangabeza uAbrahama mhla ebuya ekubulaleni amakhosi, wambusisa;

² uAbrahama wamabela okwetshumi kukho konke. Yena ibizo lakhe lithi kuqala ngokuphendulelwa inkosi yokulunga; besekuthiwa futhi inkosi yaseSalema, okuyikuthi inkosi yokuthula.

³ Yena kalayise lonina, kalasendo, kalakuqala kwensuku lokuphela kokuphila, kodwa ufana leNdodana kaNkulunkulu, uhlala engumpristi njalonjalo.

⁴ Bonani ukuthi mkhulu kangakanani lumuntu owaphiwa okwetshumi kwempango ngukhokho uAbrahama.

⁵ Lalabo abangamadodana kaLevi abamukeliswe ubupristi balamandla okwamukela okwetshumi ebantwini ngokomthetho, okuyikuthi kubafowabo, loba labo beyinzalo kaAbrahama.

⁶ Kodwa yena ongabalelwa ozalweni lwabo wamukela okwetshumi kuAbrahama, wambusisa lowo owayelezithembiso.

⁷ Kakuphikwa ukuthi omncinyane ubusiswa ngomkhulu.

⁸ Laphake abantu ababhubhayo bamukela okwetshumi, kodwa lapho kwamukelwa yilowo okufakazwa ngaye ukuthi uyaphila.

⁹ Futhi kungatshiwo ngoLevi uqobo yena owamukela okwetshumi ukuthi wanikela okwetshumi ngaye uAbrahama,

¹⁰ ngoba wayesesokhalweni lukakhokho wakhe mhla uMelkizedeki emhlangabeza.

¹¹ Ubake kwakukhona ukuphelela ngobupristi bukaLevi, ngoba isizwe sanikwa umlayo ngenxa yabo, kwakusadingekelani ukuba kuvele omunye umpristi ngokwendlela kaMelkizedeki engabizwa ngokwendlela kukaAroni na?

¹² Ngoba uba ubupristi buphendulwa, kuyadingeka ukuba kuphendulwe lomlayo.

¹³ Kodwa lowo okukhulunywa ngaye ungowesinye isizwe, okungabanga khona kuso owake wakhonza ealtareni.

¹⁴ Ngoba kusobala ukuthi iNkosi yethu yavela koJuda, isizwe uMose angakhulumanga lutho ngaso mayelana lobupristi.

¹⁵ Ikakhulu kusobala kulokho, lapho sekumiswa omunye umpristi ofana loMelkizedeki,

¹⁶ ongamiswanga ngokomthetho wokuzalwa ngokwenyama kodwa ngamandla okuphila okungapheliyo.

¹⁷ Ngoba kufakazwa ngaye ukuthi: Wena ungumpristi kuze kube nini lanini ngokwendlela kaMelkizedeki.

¹⁸ Umthetho wokuqala uyachithwa ngenxa yobuthakathaka bawo lokungasizi lutho kwawo,

¹⁹ ngoba umlayo kawuzanga wenze ulutho luphelele; sekungeniswa ithemba elingcono, esisondela ngalo kuNkulunkulu.

²⁰ Ukumiswa kwalo kakwenziwanga ngaphandle kwesifungo.

²¹ Labo kambe ababekwa kuqala babe ngabapristi babekwa ngaphandle kwesifungo; kodwa yena wabekwa ngokufunga, nguye owatsho kuye ukuthi: INkosi yafunga, kayiyikuzisola, yathi: Wena ungumpristi kuze kube nini lanini.

²² Lokho kwenza uJesu abe yisiqiniso sesivumelwano esingcono.

²³ Abapristi bakuqala babebanengi, ngoba bavinjelwa yikufa ukuba bahlale njalo esikhundleni;

²⁴ kodwa yena, ngenxa yokuba ehlala njalo, ulobupristi obungaphendukiyo.

²⁵ Ngakhoke ulamandla okusilisa ngokupheleleyo abeza kuNkulunkulu ngaye, lokhu ephilela ukubanxusela.

²⁶ Umpristi omkhulu onjalo usifanele thina, ongcwele, ongelacala, ongelasici, owahlukanisiweyo kuzo izoni, owaphakanyiselwa emazulwini.

²⁷ Kadingi njengalabo abapristi abakhulu ukunikela insuku ngensuku ngemihlatshelo ngenxa yezakhe izono kuqala langasemuva langenxa yezono zabantu; ngoba wakwenza lokho kwaba kanye mhla ezinikela yena.

²⁸ Umlayo uyamisa abantu ababuthakathaka babe ngabapristi abakhulu, kodwa ilizwi lesifungo elalandela umlayo lamisa iNdodana ephelelisiweyo kuze kube nininini.