AmaHebheru 6 - iBhayibhili Elingcwele 1978

Kuhle ukuqhubekela kokupheleleyo

¹ Ngakhoke kasedlule ezifundisweni zokuqala ngoKristu siqhubekele kokupheleleyo, singabeki futhi isisekelo sokuphenduka emisebenzini efileyo lesokukholwa kuNkulunkulu;

² asingafundisi futhi ngobhaphathizo langokubeka izandla, lokuvuka kwabafileyo, lokulahlwa okungapheliyo.

³ Sizakuqhubekela phambili aluba uNkulunkulu evuma.

⁴ Ngoba labo asebake bakhanyiswa, bezwa isipho sasezulwini, bahlanganyela loMoya oNgcwele,

⁵ bezwa ilizwi elihle likaNkulunkulu kanye lamandla esikhathi esizayo,

⁶ kodwa emva kwalokho babuya bahlamuka, kakulakwenzeka ukuba babuye bavuswe baphenduke, lokhu besazibethelela iNdodana kaNkulunkulu beyithela ngehlazo obala.

⁷ Umhlabathi onatha izulu elina kanengi phezu kwawo, umile imibhida ebasizayo abawulimayo, uyabusiswa nguNkulunkulu;

⁸ kodwa uba uveza ameva lokhula, kawusizi lutho, useduze lokuqalekiswa, ukuphela kwawo kuyikutshiswa.

⁹ Lanxa sisitsho njalo, bathandekayo, siyathemba ngani okuhle okuqondene lokusiliswa.

¹⁰ Ngoba uNkulunkulu kasuye ongalunganga ukuba akhohlwe umsebenzi wenu lothando elalubonakalisa ngenxa yakhe ngokusebenzela abangcwele, njengoba lisakwenza.

¹¹ Sifisa ukuba ilowo lalowo wenu akubonakalise lokhukukhuthala, lize liphelele ithemba lenu ekupheleni,

¹² ukuze lingabi ngabavilaphayo, kodwa libalingise labo abathi ngokukholwa langokubekezela badla ilifa lesithembiso.

Izithembiso zikaNkulunkulu ziyavusa ithemba

¹³ Lapho uNkulunkulu ethembisa uAbrahama, wazifunga yena, ngoba kungekho omkhulu kulaye angamfunga.

¹⁴ Wathi: Impela ngizakukubusisa, ngikwandise.

¹⁵ Ngokunjalo kwathi uAbrahama esebekezele, wakuzuza okwathenjiswayo.

¹⁶ Impela abantu bayafunga ngomkhulu kulabo, kibo isifungo siyaqeda ukuphikisana, siqinise.

¹⁷ Ngakhoke lapho uNkulunkulu ethanda ukubonisa ngokupheleleyo kuzo izindlalifa zesithembiso ukungaphenduki kwecebo lakhe, waqinisa ngesifungo,

¹⁸ ukuze ngezinto ezimbili ezingaphendukiyo, uNkulunkulu angaqambi manga ngazo, sibe lenduduzo elamandla thina esibalekele ukucatsha kuye, sibambelele ethembeni elibekwe phambi kwethu.

¹⁹ Lelothemba silalo njengesikhonkwane esiqinileyo somphefumulo, ligxilile, lingena endaweni engcwele engemva kweveli,

²⁰ lapho uJesu angena khona engumanduleli, esewaba ngumpristi omkhulu ngokungapheliyo ngokwendlela kaMelkizedeki.