AmaHebheru 4 - iBhayibhili Elingcwele 1978

Ukungena ekuphumuleni kukaNkulunkulu

¹ Ngakhoke lapho sisekhona isithembiso sokungena ekuphumuleni kwakhe asesabe, funa kube khona omunye wenu ofunyanwa esahluleka ukufinyelela kukho.

² Ngoba phela lathi satshunyayezwa indaba ezinhle njengabo; kodwa ilizwi abalizwayo kalibasizanga bona, lokhu lingahlangananga lokukholwa kulabo abalizwayo.

³ Ngoba thina esikholwayo siyangena ekuphumuleni kwakhe njengokutsho kwakhe ukuthi: Njengoba ngifungile ekuthukutheleni kwami, kabazukungena ekuphumuleni kwami. Kanti imisebenzi kaNkulunkulu yayiqediwe kusukela ekudatshulweni komhlaba.

⁴ Ngoba utshilo endaweni ethile ngosuku lwesikhombisa ukuthi: UNkulunkulu waphumula ngosuku lwesikhombisa emisebenzini yakhe yonke.

⁵ Lakulindawo uthi futhi: Kabazukungena ekuphumuleni kwami.

⁶ Ngakhoke lokhu kusabahlalele ukuba abanye bangene kukho, lalabo abatshunyayezwa kuqala indaba ezinhle behluleka ukungena ngokungalaleli,

⁷ uNkulunkulu uyamisa futhi usuku oluthile oluthiwa kulamuhla, esithi ngoDavida emva kwesikhathi esingaka njengokutshiwoyo kuqala ukuthi: Lamuhla, uba lizakulizwa ilizwi lakhe, lingazenzi zibe lukhuni inhliziyo zenu.

⁸ Ngoba uba uJoshuwa wayebaphumuzile, uNkulunkulu wayengayikukhuluma emva kwalokho ngolunye usuku.

⁹ Ngakhoke kubalindele abantu bakaNkulunkulu ukuphumula kweSabatha;

¹⁰ ngoba ongenileyo ekuphumuleni kukaNkulunkulu laye uyaphumula emisebenzini yakhe njengoNkulunkulu.

¹¹ Ngakhoke asikhuthalele ukungena kulokhokuphumula, ukuze kungawi loyedwa ngalesisibonelo sokungalaleli.

¹² Ngoba ilizwi likaNkulunkulu liphilile, lilamandla, libukhali kulomhedla osika inxa zombili, lihlaba kuze kwahlukane umphefumulo lomoya, amalunga lomnkantsho, lihlola imicabango lamacebo enhliziyo.

¹³ Futhi kakulalutho oludaliweyo olungabonakaliyo phambi kwakhe, kodwa konke kwambuliwe kusobala emehlweni akhe esizakuzilanda kuye.

UKristu ungumpristi omkhulu kakhulu

¹⁴ Ngakhoke lokhu silompristi omkhulu kakhulu odlule emazulwini, uJesu iNdodana kaNkulunkulu, asibambelele kuso isivumo sethu.

¹⁵ Ngoba kasilaye umpristi omkhulu ongelakuzwelana lobuthakathaka bethu, kodwa owalingwa kukho konke njengathi, kanti kalasono.

¹⁶ Ngakhoke asisondele ngesibindi esihlalweni somusa ukuba samukeliswe isihawu, sizuze umusa wokusisiza ngesikhathi esifaneleyo.