AmaHebheru 3 - iBhayibhili Elingcwele 1978

UKristu mkhulu kuloMose

¹ Ngakhoke, bazalwane abangcwele, abahlanganyela ekubizweni kwasezulwini, qaphelani uJesu umphostoli lompristi omkhulu wesivumo sethu,

² owathembeka kulowo owammisayo, njengoba uMose laye wayenjalo endlini kaNkulunkulu.

³ UJesu kwathiwa ufanele udumo olukhulu kuloMose, njengoba umakhi wendlu ulodumo olukhulu kulendlu.

⁴ Ngoba indlu ileyo laleyo yakhiwa ngothile; kodwa umakhi wezinto zonke nguNkulunkulu.

⁵ UMose kambe wayethembekile endlini yonke kaNkulunkulu njengenceku, ukuze kufakazelwe lokho obekuzakukhulunywa;

⁶ kodwa uKristu uthembekile phezu kwendlu kaNkulunkulu njengendodana. Thina siyindlu yakhe, uba sihlala silesibindi siziqhenya ngethemba lethu.

Abakholwayo kabangadeleli ilizwi lakhe

⁷ Ngakhoke njengokutsho kukaMoya oNgcwele ukuthi: Lamuhla, uba lizakulizwa ilizwi lakhe,

⁸ lingazenzi zibe lukhuni inhliziyo zenu njengasekuthukutheliseni ngosuku lokulingwa enkangala,

⁹ lapho okhokho benu bangilinga bengihlola, babona imisebenzi yami okweminyaka engamatshumi amane.

¹⁰ Ngakhoke ngasithukuthelela lesosizukulwana, ngathi: Bayaduha njalonjalo enhliziyweni zabo, kabazazanga izindlela zami,

¹¹ ngaze ngafunga ekuthukutheleni kwami, ngathi: Kabazukungena ekuphumuleni kwami.

¹² Xwayani, bazalwane, funa kube khona omunye wakini olenhliziyo embi, engakholwayo, emduhisa kuNkulunkulu ophilayo.

¹³ Kodwa layanani insuku ngensuku kusathiwa kulamuhla, ukuze kungabi khona kini owenziwa lukhuni yikukhohlisa kwesono.

¹⁴ Ngoba siyahlanganyela kuKristu, uba sibambisisa ithemba lethu lokuqala kuze kube sekupheleni.

¹⁵ Kuthiwa: Lamuhla, uba lilizwa ilizwi lakhe, lingazenzi zibe lukhuni inhliziyo zenu njengasekuthukutheliseni.

¹⁶ Phoke, ngobani abezwayo bathukuthelisa na? Kakusibo bonke labo abaphuma eGibithe loMose na?

¹⁷ Ngobani uNkulunkulu athukutheliswa yibo okweminyaka engamatshumi amane na? Kakusibo labo abonayo, abazidumbu zabo zahlakazeka enkangala na?

¹⁸ Ngobani afunga kibo ukuthi kabazukungena ekuphumuleni kwakhe, uba kungesibo abangalalelanga na?

¹⁹ Ngakhoke siyabonake ukuthi babengelakungena ngenxa yokungalaleli kwabo.