AmaHebheru 2 - iBhayibhili Elingcwele 1978

UKristu waba mncinyane okwesikhatshana kulezithunywa

¹ Ngakhoke asiqaphelisise esikuzwileyo funa mhlawumbe siduhe kukho.

² Ngoba uba ilizwi elakhulunywa yizithunywa laqiniseka, lakho konke ukuphambuka lokungalaleli kwaphindiselwa ngokufaneleyo,

³ thina sizakuphepha kanjani, uba sidelela ukusiliswa okungaka na? Kwakhulunywa kuqala yiNkosi, kwafakazwa kithi yilabo abayizwayo,

⁴ uNkulunkulu futhi efakaza kanye labo ngezibonakaliso langezimangaliso langemisebenzi yamandla eyizinhlobonhlobo langeziphiwo zikaMoya oNgcwele, ezabelwa ngokwentando yakhe.

⁵ Ngoba kwakungesizo izithunywa uNkulunkulu ehlisela ngaphansi kwazo ilizwe elizayo esikhuluma ngalo.

⁶ Kufakaziwe endaweni ethile ngokuthi: Umuntu uyini ukuba umkhumbule wena, lendodana yomuntu ukuba uyinanze na?

⁷ Wamenza waba mncinyane kulezithunywa okwesikhatshana; wamethwesa umqhele wobukhosi lodumo;

⁸ izinto zonke wazibeka ngaphansi kwenyawo zakhe. Ngoba ekubekeni izinto zonke ngaphansi kwakhe katshiyanga lutho olungabekwanga ngaphansi kwakhe. Kodwa khathesi kasikaziboni izinto zonke zibekiwe ngaphansi kwakhe.

⁹ Kodwa siyambona uJesu owenziwa waba mncinyane okwesikhatshana kulezithunywa ethwesiwe umqhele wobukhosi, lowodumo ngenxa yenhlupheko yokufa, ukuze ngomusa kaNkulunkulu ezwe ukufa ngenxa yabo bonke.

¹⁰ Kwakumfanele uNkulunkulu, okukhona konke ngenxa yakhe lokukhona konke ngaye, ukuba, lapho eletha amadodana amanengi enkazimulweni, amphelelise ngezinhlupheko oyinkosi yokusiliswa kwabo.

¹¹ Ngoba lowo owenza ukuba babe ngcwele lalabo abenziwa baba ngcwele ngabohlanga lunye; ngakhoke kalanhloni ukubabiza ngokuthi ngabafowethu,

¹² esithi: Ngizakubatshumayeza abafowethu ibizo lakho, ngikudumise phakathi kwebandla.

¹³ Futhi uthi: Ngizakubeka ithemba lami kuye. Abuye athi: Khangela mina labantwana uNkulunkulu anginike bona.

¹⁴ Ngakhoke njengoba abantwana behlanganyela inyama legazi, laye uqobo wahlanganyela khona lokho, ukuze ngokufa amchithe yena obelamandla okufa onguSathane,

¹⁵ abakhulule ebugqilini bonke labo abathi ngokwesaba ukufa ekuphileni kwabo konke baba yizigqili.

¹⁶ Ngoba phela kasizi izithunywa, kodwa usiza inzalo kaAbrahama.

¹⁷ Ngakhoke kwamfanela ukuba abe njengabafowabo kukho konke, ukuze abe ngumpristi omkhulu olesihawu lothembekileyo enkonzweni kaNkulunkulu, ukuba abe yinhlawulo yezono zabantu.

¹⁸ Ngoba lokhu wahlupheka yena uqobo elingwa, ulamandla okusiza abalingwayo.