AmaHebheru 13 - iBhayibhili Elingcwele 1978

Izeluleko eziyinhlobonhlobo

¹ Kalume njalo uthando lobuzalwane.

² Lingakhohlwa ukungenisa izihambi, ngoba ngalokho abanye bangenisa izithunywa bengazazi.

³ Bakhumbuleni ababotshiweyo ngokungathi lani libotshiwe kanye labo, labaphethwe kubi, lokhu lani lisekhona.

⁴ Ukuthathana kakuhlonitshwe yibo bonke, kuhlonitshwe lesifungo somthimba, ngoba uNkulunkulu uzakuzithonisisa iziphingi lezifebe.

⁵ Lingaphileli imali; laneliswe yilokho elilakho; ngoba yena utshilo ukuthi: Kangisoze ngakulahla, kangisoze ngakutshiya.

⁶ Ngakho singatsho ngesibindi ukuthi: INkosi ingumsizi wami, kangiyikwesaba; umuntu angenzani kimi na?

⁷ Khumbulani abakhokheli benu labo abalitshumayeza ilizwi likaNkulunkulu, liqaphelise ukuphela kokuhamba kwabo, lilingisele ukukholwa kwabo.

⁸ UJesu Kristu nguye izolo, lalamuhla, lanininini.

⁹ Lingaduhiswa yizifundiso eziyinhlobonhlobo lezingaziwayo; ngoba kuhle ukuthi inhliziyo iqiniswe ngomusa, kungabi ngokudla okungabasizanga lalabo ababebambelela kukho.

¹⁰ Silalo ialtare thina, abangelalungelo lokudla kulo abapristi abakhonza ethenteni.

¹¹ Izidumbu zalezozinyamazana, igazi lazo elingeniswa ngumpristi omkhulu endaweni engcwele ngenxa yezono, zitshiswa ngaphandle komuzi.

¹² Ngakho laye uJesu, ukuze enze abantu babe ngcwele ngegazi lakhe, wahlupheka ngaphandle kwesango.

¹³ Ngakhoke asiphumele kuye ngaphandle komuzi, sithwale ihlazo lakhe.

¹⁴ Ngoba kasilawo umuzi omiyo lapha, kodwa sidinga umuzi ozayo.

¹⁵ Ngakhoke asinikele njalonjalo kuNkulunkulu ngoJesu umhlatshelo wokubonga, okutsho isithelo sokubonga semilomo evuma ibizo lakhe;

¹⁶ lingakhohlwa ukwenza okuhle lokuphana; ngoba iminikelo enjalo iyamthokozisa uNkulunkulu.

¹⁷ Lalelani abakhokheli benu, lizehlisele ngaphansi kwabo, ngoba balinda imiphefumulo yenu njengabantu abazakulandisa ngayo. Kabakwenze lokhu ngokujabula, bangabubuli, ngoba lokhu kakulakusiza.

Isicino

¹⁸ Sikhulekeleni, ngoba siyazi ukuthi silesazela esihle, sifisa ukuhamba kuhle ezintweni zonke.

¹⁹ Ngiyalilaya kakhulu ukuba likwenze lokhu, ukuze ngibuyiselwe kini masinyane.

²⁰ Kungathi uNkulunkulu wokuthula owamkhuphula kwabafileyo uJesu, iNkosi yethu, umalusi omkhulu wezimvu ngegazi lakhe lesivumelwano esimiyo njalo,

²¹ angaliphelelisa kukho konke okuhle, ukuze lenze intando yakhe, esebenza kini lokho okumthokozisayo ngoJesu Kristu; kakube kuye ubukhosi kuze kube nininini. Ameni.

²² Ngiyalincenga, bazalwane, lamukeleni ngesineke ilizwi lami lokulaya, ngoba ngililobele ngokufitshane.

²³ Yazini ukuthi umzalwane wethu uTimothi ukhululwe; uba efika masinyane ngizakulibona ngilaye.

²⁴ Bingelelani bonke abakhokheli benu labo bonke abangcwele. AbaseItaliya bayalibingelela.

²⁵ Umusa kawube lani lonke. Ameni.