AmaHebheru 12 - iBhayibhili Elingcwele 1978

Ukubekezela ezinhluphekweni

¹ Ngakhoke lathi, lokhu sihanqwe lixuku elingaka labofakazi, asilahle konke okusindayo lesono esithandele kangaka kithi, sigijime ngokubekezela lokhukuncintanisana esikumiselweyo,

² sikhangele kuJesu, umqalisi lomphelelisi wokukholwa kwethu, owathi endaweni yentokozo ayimiselweyo wathwala isiphambano engalinanzi ihlazo, wahlala ngakwesokunene sesihlalo sobukhosi sikaNkulunkulu.

³ Mqapheliseni yena owakhuthazela ephikwa kangaka yizoni, ukuze lingadinwa, liphelelwe ngamandla enhliziyweni.

⁴ Ekulweni kwenu lesono kalikamelani laso kuze kuchitheke igazi.

⁵ Selikhohliwe yini umlayo okhuluma kini njengasebantwaneni owokuthi:

⁶ Ndodana yami, ungadeleli ukulaya kweNkosi, uphele amandla, nxa usolwa yiyo, ngoba iNkosi iyamlaya emthandayo, itshaye ilowo lalowo wamadodana ewamukelayo.

⁷ Bekezelani ekulayweni; uNkulunkulu uliphathisa okwabantwana, ngoba yiyiphi indodana engalaywanga nguyise na?

⁸ Uba lingalaywa ngokwabantwana bonke kaliseyiwo amadodana, lingabantwana bokufetshwa.

⁹ Futhike sasilabo obaba basemhlabeni abasilayayo, sabahlonipha; pho, kasiyikuzehlisela ngaphansi kukaYise wemimoya yethu kakhulu kulalokho, siphile, na?

¹⁰ Ngoba bona kambe basilaya okwesikhatshana njengokubona kwabo, kodwa yena usilayela ukusizakala kwethu, ukuze sizuze ukuhlanganyela ubungcwele bakhe.

¹¹ Konke ukulaywa kambe kakuthokozisi ngalesosikhathi, kodwa ngasemuva kuyabalethela isithelo esihle sokulunga labo abakhuliswa ngakho.

¹² Ngakhoke qinisani izandla ezibuthakathaka lamadolo axegayo,

¹³ lenzele inyawo zenu indlela eziqondileyo ukuze okuqhulayo kunganyeli, kodwa kusiliswe.

¹⁴ Nxwanelani ukuhlala ngokuthula labantu bonke, linxwanele lobungcwele; ongelabo bona angeyibone iNkosi.

¹⁵ Qaphelisani kungabi khona osilelayo emuseni kaNkulunkulu, kungabi khona lampande ebabayo ehlumayo ukubangcolisa abanengi,

¹⁶ kungabi khona oyisifebe longakhonzi uNkulunkulu njengoEsawu owathengisa ubuzibulo bakhe ngenxa yokudla okukodwa.

¹⁷ Ngoba liyazi ukuthi, ngasemuva lapho esethanda ukuzuza isibusiso, waliwa; ngoba kalitholanga ithuba lokuphenduka, loba esesidinga ekhala izinyembezi.

Intaba yaseSinayi leyaseZiyone

¹⁸ Kalizanga kukho okungazwiwa ngokuthintwa, emlilweni ovuthayo, lasemnyameni, lasekufiphaleni, lasesivunguvungwini,

¹⁹ lasekukhaleni kophondo, laselizwini elakhuluma amazwi okwathi labo abawezwayo bancenga ukuba kungabe kusakhulunywa ilizwi kibo;

²⁰ ngoba babengelakukumela lokho okwatshiwoyo kokuthi: Ngitsho inyamazana nje uba ithinta intaba izakukhandwa ngamatshe.

²¹ Impela kwakusesabeka lokho okwabonwayo, uMose waze wathi: Ngilovalo ngiyathuthumela.

²² Kodwa lina lize entabeni yaseZiyone lasemzini kaNkulunkulu ophilayo, iJerusalema elasezulwini, lakuzithunywa eziyizigidi ezingelakubalwa ezihlangene ngokuthokoza,

²³ lasemhlanganweni wamazibulo abhalwe ezulwini, lakuNkulunkulu umahluleli wakho konke, lakumimoya yabalungileyo abaphelelisiweyo,

²⁴ lakuJesu umlamuli wesivumelwano esitsha, ogazi lakhe elifafaziweyo likhuluma okuhle kakhulu kulelikaAbela.

²⁵ Qaphelani ukuba lingali ukulalela ilizwi lakhe okhulumayo; ngoba uba bengaphephanga labo abala ukumlalela lowo owabaxwayisa emhlabeni, kakhulu kasiyikuphepha thina esimalayo lowo oxwayisa esezulwini.

²⁶ Ngalesosikhathi ilizwi lakhe lanyikinya umhlaba, kodwa khathesi uthembisile ukuthi: Ngizakuphinda futhi ukunyikinya, kungasumhlaba wodwa, kodwa lamazulu futhi.

²⁷ Lamazwi okuthi ngizakuphinda futhi, atsho ukuthi lezozinto ezidaliweyo ezinyikinyiweyo zizakususwa, ukuze kusale kuphela lokho okunganyikinyekiyo.

²⁸ Umbuso esiwuphiweyo kawulakunyikinyekiswa; ngakho asimbonge uNkulunkulu, ukuze simkhonze njengokuba efanele ukukhonzwa, ngokuthobeka langokwesaba;

²⁹ ngoba uNkulunkulu wethu ungumlilo oqothulayo.