AmaHebheru 10 - iBhayibhili Elingcwele 1978

Umhlatshelo kaKristu mkhulu kulemihlatshelo yabaJuda

¹ Ngoba lokhu umlayo ulesithunzi sezinto ezinhle ezizayo, ungesiwo umfanekiso oqotho wazo uqobo, ungeze waba lamandla ngaleyomihlatshelo enikelwa njalonjalo iminyaka ngeminyaka ukubenza baphelele labo abasondelayo.

² Uba kwakungenjalo, ngabe kayiyekelwanga ukunikelwa na? Ngoba phela abakhonzayo sebehlanjululwe kanye, babengasayikuba lovalo lwezono.

³ Kodwa kuleyomihlatshelo kukhona ukukhunjulwa kwezono iminyaka ngeminyaka,

⁴ ngoba kakulakwenzeka ukuba igazi lezinkunzi lelezimbuzi lisuse izono.

⁵ Ngakhoke esefikile uKristu emhlabeni wathi: Imihlatshelo leminikelo kawuyithandanga, kodwa ungilungisele umzimba.

⁶ Iminikelo yokutshiswa leminikelo yesono kawuyithokozelanga.

⁷ Ngasengisithi: Khangela, ngizile ukwenza intando kaNkulunkulu njengokulotshiweyo ngami ogwalweni.

⁸ Kuqala wathi: Imihlatshelo, leminikelo, leminikelo yokutshiswa, leyezono, kawuyithandanga kawuyithokozelanga — yona inikelwa ngokomlayo —

⁹ wabuya wathi: Khangela, ngizile ukwenza intando yakho. Ususa okokuqala, ukuze amise okwesibili.

¹⁰ Ngaleyontando senziwe saba ngcwele ngokunikelwa komzimba kaJesu Kristu kanye kuphela.

¹¹ Umpristi yilowo lalowo kambe uyema insuku ngensuku enkonzweni, enikela kanengi ngaleyomihlatshelo engasoze yaba lamandla okususa izono.

¹² Kodwa uKristu esenikelele isikhathi sonke umhlatshelo waba munye ngenxa yezono, wahlala phansi ngakwesokunene sikaNkulunkulu,

¹³ uselindele izitha zakhe zize zenziwe isigcabha senyawo zakhe.

¹⁴ Ngoba ngomnikelo munye uphelelisile okwesikhathi sonke labo abenziwe baba ngcwele.

¹⁵ LoMoya oNgcwele laye uyasifakazela thina; ngoba kuqala uthi:

¹⁶ Yilesisivumelwano engizakusenza labo emva kwalezonsuku, kutsho iNkosi: ngizakufaka imilayo yami enhliziyweni zabo, ngiyilobe engqondweni zabo;

¹⁷ abesisithi: Lezono zabo lobubi babo kangisayikukukhumbula futhi.

¹⁸ Lapho okukhona ukuthethelelwa kwalokhu, kakusadingeki umnikelo ngenxa yezono.

Ukuthokoziswa, lokuxwayiswa kwabakholwayo

¹⁹ Ngakhoke, bazalwane, silesibindi sokungena endaweni engcwele ngegazi likaJesu

²⁰ ngendlela entsha lephilayo, asivulele yona edabula iveli, okuyikuthi umzimba wakhe.

²¹ Futhi silaye umpristi omkhulu wendlu kaNkulunkulu;

²² ngakhoke asisondele ngenhliziyo eqinisileyo langokuthemba okupheleleyo kokukholwa, zifafaziwe inhliziyo zethu, lungasekho uvalo lokubi, lemizimba yethu igezisiwe ngamanzi acwebileyo.

²³ Kasibambisise isivumo sokuthemba kwethu singanyikinyeki, ngoba uthembekile lowo owasithembisayo.

²⁴ Kasiqaphelisise ukuba singavuselelana kanjani ekuthandaneni lemisebenzini emihle,

²⁵ singadeleli ukuhlangana kwethu njengomkhuba wabanye, kodwa sivuselelane, ikakhulu njengoba libona Usuku selusondela.

²⁶ Ngoba uba sisona ngabomu emva kokuba samukele ukwazi iqiniso, kakusekho umnikelo ngezono,

²⁷ kodwa kuphela ukulindela okwesabekayo ukulahlwa lomlilo otshisayo ozakuqeda abaphikayo.

²⁸ Odelela umlayo kaMose uyabulawa ngelizwi labofakazi ababili loba abathathu, engahawukelwa.

²⁹ Pho, lithi ufanele ukutshaywa okungakanani lowo onyathela phansi iNdodana kaNkulunkulu, edelela igazi lesivumelwano enziwe waba ngcwele ngalo, ehlambaza uMoya womusa, na?

³⁰ Ngoba siyamazi owathi: Impindiselo ngeyami; ngizakubuyisela. Wabuya wathi: INkosi izakwahlulela abantu bayo.

³¹ Kuyesabeka ukuwela ezandleni zikaNkulunkulu ophilayo.

³² Khumbulani insuku zakuqala, okwathi ngazo selikhanyisiwe lakhuthazela ebunzimeni obukhulu kanye lezinhluphekweni.

³³ Kokunye lisenziwa umbukiso ngenhlamba langezinhlupheko, kokunye lihlanganyela labanye ababephathwa ngokunjalo.

³⁴ Ngoba lazwelana lababotshiweyo, lavuma ngokuthokoza ukwamukwa impahla yenu, lokhu lisazi ukuthi lina lilempahla enhle kulaleyo, impahla engapheliyo.

³⁵ Ngakhoke lingalahlekelwa yisibindi senu esilomvuzo omkhulu.

³⁶ Ngoba lifanele ukubekezela, ukuze kuthi seliyenzile intando kaNkulunkulu lamukeliswe okwathenjiswayo.

³⁷ Kunjengokulotshiweyo ukuthi: Ngoba kuseyisikhatshana nje, ozayo uzakufika, kazukulibala;

³⁸ olungileyo wami uzakuphila ngokukholwa; kodwa uba ehlehlela emuva, umphefumulo wami kawulakuthokoza ngaye.

³⁹ Kodwa thina kasisibo abahlehlela emuva babhujiswe; singabokukholwa, ukuze kusiliswe imiphefumulo yethu.