AmaHebheru 1 - iBhayibhili Elingcwele 1978

UKristu mkhulu kulezithunywa zonke

¹ UNkulunkulu wakhuluma endulo kubokhokho ngabaprofethi ngamathuba amanengi langezindlela ezinengi.

² Kodwa kulezinsuku zokucina ukhulume kithi ngeNdodana ayimise ibe yindlalifa yezinto zonke, yona adala ngayo futhi umhlaba.

³ Yona iyikubenyezela kwenkazimulo kaNkulunkulu, ifuze yena uqobo, iphethe izinto zonke ngelizwi layo lamandla. Lapho isiyenzile ukuhlanjululwa kwezono, yahlala phansi ngakwesokunene soMkhulu phezulu,

⁴ yaba nkulu kulezithunywa, njengalokhu ibizo eliyilifa layo lilikhulu kulelazo.

⁵ Ngoba yisiphi isithunywa uNkulunkulu ake atsho kuso na ukuthi: Wena uyiNdodana yami, lamuhla ngikuzele? Lokuthi: Ngizakuba nguyise kiyo, yona ibe yindodana kimi?

⁶ Futhi mhla eletha olizibulo emhlabeni uthi: Lezithunywa zonke zikaNkulunkulu kazimkhonze.

⁷ Ngezithunywa uthi: Owenza izithunywa zakhe zibe yimimoya, lezinceku zakhe zibe ngamalangabi omlilo.

⁸ Kodwa ngeNdodana uthi: Isihlalo sakho sobukhosi, Nkulunkulu, simi kuze kube nininini, intonga yokulunga iyintonga yombuso wakho.

⁹ Uthandile ukulunga, wazonda ububi; ngakhoke uNkulunkulu, uNkulunkulu wakho ukwenze waba mkhulu kulabanakwenu ngokukugcoba ngamagcoba entokozo.

¹⁰ Lokuthi: Wena Nkosi, wabeka isisekelo somhlaba ekuqaleni, amazulu angumsebenzi wezandla zakho.

¹¹ Kuzakubhubha lokho, kodwa wena umi njalonjalo; kuzakuguga konke njengengubo;

¹² njengesambatho uzakukugoqa; kuzakuphendulwa njengengubo. Kodwa wena nguwe njalo, iminyaka yakho kayizukuphela.

¹³ Kukusiphi isithunywa ake atsho kuso na ukuthi: Hlala ngakwesokunene sami, ngize ngenze izitha zakho zibe yisigcabha senyawo zakho?

¹⁴ Kazisibo yini zonke omoya abasebenzayo abathunyelwe ukukhonza ngenxa yalabo abazakudla ilifa lokusiliswa na?