Abase-Efesu 6 - iBhayibhili Elingcwele 1978

Izeluleko kubantwana labazali

¹ Bantwana, lalelani abazali benu, ngoba lokhu kulungile.

² Hlonipha uyihlo lonyoko; lo ngumlayo wokuqala olesithembiso

³ sokuthi kuze kube kuhle kuwe, usile isikhathi eside emhlabeni.

⁴ Lani bobaba, lingabathukuthelisi abantwana benu, kodwa libondle ngokulaya langokufundisa kweNkosi.

Izeluleko kuzo izigqili lamakhosi

⁵ Zigqili, lalelani abangamakhosi enu emhlabeni ngokwesaba langokuthuthumela ngobuqotho benhliziyo, kungathi lilalela uKristu,

⁶ kungesikho ngokuthokozisa amehlo njengabathokozisa abantu, kodwa njengezigqili zikaKristu ezenza intando kaNkulunkulu ngenhliziyo.

⁷ Sebenzani ngenhliziyo enhle, kungathi lisebenzela iNkosi kungesikho abantu;

⁸ lazi ukuthi konke okuhle umuntu akwenzayo, uzakwamukeliswa okunjalo yiNkosi, loba eyisigqili loba engokhululekileyo.

⁹ Lani makhosi, yenzani ngokunjalo kuzo, liyekele ukuzisongela, lazi ukuthi iNkosi yazo leyenu isezulwini, lokuthi kayibandlululi muntu yona.

Izikhali zamaKristu

¹⁰ Elokucinake, qinani eNkosini lasemandleni ayo amakhulu.

¹¹ Hlomani izikhali zonke zikaNkulunkulu, ukuze libe lamandla okumelana lobuqili bukaSathane.

¹² Ngoba kasilwi lenyama legazi, kodwa silwa lemibuso, lamandla, lababusi balumhlaba womnyama, lempi yemimoya emibi yaphezulu.

¹³ Ngakhoke hlomani izikhali zonke zikaNkulunkulu ukuze libe lamandla okuma ngosuku olubi, lokuze kuthi lapho seliqede umsebenzi wonke, lime.

¹⁴ Ngakho manini, izinkalo zenu zibotshiwe ngeqiniso, lifakile isivikelo sesifuba esiyikulunga,

¹⁵ lifakile amanyathelo ezinyaweni zenu ukuba lilungele ukutshumayela ivangeli lokuthula.

¹⁶ Phezu kwakho konke lithathe isihlangu sokukholwa elizakuba lamandla okucima ngaso yonke imitshoko evuthayo yomubi,

¹⁷ lithathe ingowane yokusiliswa, lomhedla kaMoya oyilizwi likaNkulunkulu.

¹⁸ Khulekani izikhathi zonke ngoMoya ngokucela konke langokunxusa. Kulokhu lilinde ngesineke sonke, linxusele abangcwele bonke.

¹⁹ Linginxusele lami ukuba ngiphiwe ilizwi, nxa ngivula umlomo wami, ukuze ngitshumayele ngesibindi imfihlakalo yevangeli,

²⁰ engiyisithunywa ngalo esibotshiweyo ngeketane, ukuze ngitshumayele ngesibindi, njengokuba kufanele ukuba ngikhulume.

Isicino

²¹ Kodwa, ukuze lani lazi okumaqondana lami lalokho engikwenzayo, uzakulitshela konke uTikiko, umzalwane othandekayo lesikhonzi esithembekileyo eNkosini.

²² Ngiyamthumela kini ngakhona lokhu ukuba lazi izindaba zethu, lokuba aduduze inhliziyo zenu.

²³ Ukuthula kakube kubazalwane, lothando kanye lokukholwa okuvela kuNkulunkulu uYise laseNkosini uJesu Kristu.

²⁴ Umusa kawube labo bonke abathanda iNkosi yethu uJesu Kristu ngothando olungapheliyo.