Abase-Efesu 5 - iBhayibhili Elingcwele 1978

Ukuxwayisa ngemisebenzi yomnyama; ukuhamba ekukhanyeni

¹ Ngakhoke mlingiseni uNkulunkulu njengabantwana abathandekayo,

² lihambe ngothando, njengalokhu uKristu wasithanda, wazinikela ngenxa yethu, abe ngumnikelo lomhlatshelo olephunga elimnandi kuNkulunkulu.

³ Kodwa ubufebe, lakho konke ukungcola, lomhawu, kakungaphathwa lakanye phakathi kwenu, njengokuba kufanele abangcwele.

⁴ Kakungabi khona amanyala, lokukhuluma okuyize, lokulawula okungcolileyo, okuyizinto ezingafanelanga; kodwa kakube khona ukubonga.

⁵ Yazini lokhu, likuqedisise ukuthi oyisifebe, longcolileyo lolomhawu, okutsho lowo okhonza izithombe, kalalifa embusweni kaKristu lokaNkulunkulu.

⁶ Lingakhohliswa muntu ngamazwi ayize, ngoba ngenxa yalezizinto ulaka lukaNkulunkulu luyehlela phezu kwabantu abangalaleliyo.

⁷ Ngakhoke lingahlangani labo.

⁸ Ngoba lalingumnyama, kodwa khathesi liyikukhanya eNkosini. Hambani njengabantwana bokukhanya,

⁹ ngoba izithelo zokukhanya zikukho konke okulungileyo lokuhle lokuliqiniso.

¹⁰ Qedisisani okuthandekayo eNkosini.

¹¹ Lingahlanganyeli lemisebenzi yomnyama engelazithelo, kodwa ivezeni obala.

¹² Ngoba kuthelela inhloni ukukhuluma ngezinto ezenziwa yibo ekusithekeni.

¹³ Kodwa konke okuvezwa yikukhanya kuyabonakala; konke okubonakaliswayo kuyikukhanya.

¹⁴ Ngakhoke kuthiwa: Phaphama wena oleleyo, uvuke kwabafileyo, uKristu uzakukukhanyisela.

¹⁵ Ngakhoke qaphelisisani ukuthi lihamba kanjani, kungabi njengezithutha kodwa njengabahlakaniphileyo,

¹⁶ lisebenzise wonke amathuba, ngoba insuku zimbi.

¹⁷ Ngakhoke lingabi yizithutha, kodwa qedisisani okuyintando yeNkosi.

¹⁸ Lingadakwa liwayini, ngoba kuvela kukho umsindo lenkanuko ezimbi; kodwa ligcwaliswe nguMoya.

¹⁹ Khulumisanani ngamahubo langezihlabelo langezingoma, lihlabelele ngokuhlabela okumnandi eNkosini ngenhliziyo zenu zonke,

²⁰ limbonge njalo uNkulunkulu ngakho konke ebizweni leNkosi yethu uJesu Kristu.

²¹ Zehliseleni ngaphansi omunye komunye ngenxa yokuhlonipha uKristu.

Ukuphathana kwabathetheneyo

²² Bafazi, zehliseleni ngaphansi kwamadoda enu, njengokungathi kukuyo iNkosi;

²³ ngoba indoda iyinhloko yomfazi, njengokuba uKristu eyinhloko yebandla elingumzimba wakhe; yena onguMsilisi wawo.

²⁴ Njengokuba ibandla lizehlisele ngaphansi kukaKristu, ngokunjalo labafazi kabazehlisele ngaphansi kwamadoda abo ezintweni zonke.

²⁵ Madoda, thandani omkenu, njengoKristu walithanda ibandla, wazinikela ngenxa yalo,

²⁶ ukuze azahlukanisele lona, eselihlambulule ngokuligezisa ngamanzi langelizwi,

²⁷ ukuze alimise ibandla phambi kwakhe lilenkazimulo, lingelacwatshana, lomxhele loba okunye nje, kodwa libe libandla elingcwele elingelacala.

²⁸ Ngokunjalo amadoda afanele ukuthanda omkawo njengemizimba yawo. Othanda umkakhe uyazithanda yena.

²⁹ Ngoba kakho owake wazonda umzimba wakhe; kodwa uyawondla, awuphathe kuhle, njengalokhu uKristu esenza kulo ibandla;

³⁰ ngoba siyizitho zomzimba wakhe.

³¹ Ngenxa yalokhu indoda izakutshiya uyise lonina, inamathele kumkayo; labo ababili bazakuba nyamanye.

³² Yimfihlakalo enkulu le, kodwa ngikhuluma ngoKristu lebandla.

³³ Lanike, ilowo lalowo kathande umkakhe njengokuba ezithanda yena, lomfazi kahloniphe indoda yakhe.