Abase-Efesu 4 - iBhayibhili Elingcwele 1978

Ukwahlukana kwezipho zikaMoya lobunye bokukholwa

¹ Ngakhoke mina sibotshwa ngenxa yeNkosi ngiyalincenga ukuba lihambe ngokufanele ukubizwa elabizwa ngakho,

² ngokuthobeka konke lobumnene. Bekezelelanani ngothando,

³ likhuthalele ukuqinisa ngezibopho zokuthula ubunye obuvela kuMoya.

⁴ Munye umzimba, munye uMoya, njengalokhu labizelwa ethembeni linye lokubizwa kwenu;

⁵ yinye iNkosi, kunye ukukholwa, lunye ubhaphathizo;

⁶ munye uNkulunkulu, uYise wabo bonke, ophezu kwabo bonke, okubo bonke, ophakathi kwabo bonke.

⁷ Kodwa yilowo lalowo wethu waphiwa umusa ngokwesilinganiso sesipho sikaKristu.

⁸ Ngakhoke kuthiwa: Ekwenyukeleni kwakhe phezulu walandelwa ngabathunjiweyo, wanika abantu izipho.

⁹ Lokhuke ukuthi wenyukela phezulu, kakutsho yini ukuthi wake wehlela endaweni ezingaphansi zomhlaba na?

¹⁰ Yena owehlayo nguye owenyukela futhi ngaphezulu kwamazulu wonke, ukuze agcwalise izinto zonke.

¹¹ Wanika izipho zakhe ukuba abanye babe ngabaphostoli, abanye babe ngabaprofethi, abanye babe ngabavangeli, labanye babe ngabelusi bebandla, abanye babe ngabafundisi,

¹² ukuze abangcwele bapheleliselwe umsebenzi ngokukhonza, ekwakhiweni komzimba kaKristu,

¹³ size sifinyelele sonke ebunyeni bokukholwa lasekwazini iNdodana kaNkulunkulu, lasebuntwini obupheleleyo obulinganiswe ngesimo esigcweleyo sikaKristu.

¹⁴ Ngakhoke kasingabe sisaba ngabantwana abazuliswa bethwalwa yimimoya yonke yokufundisa, sikhohliswa ngabantu ngobuqili babo obulamacebo aduhisayo.

¹⁵ Kodwa asikhulume iqiniso ngothando, ukuze sikhule ngakho konke kuKristu.

¹⁶ Yena uyinhloko okuhlanganiselwa kuyo umzimba wonke, ubambane ngamalunga wonke awo, ukhule umzimba nxa ileso laleso isitho sisebenza kuhle, uzakhe ngothando.

Isimo esidala lesimo esitsha

¹⁷ Ngakhoke ngiyaqinisa, ngifakaza lokhu eNkosini, ngithi lingabe lisahamba ngokuhamba kwabezizwe ebuzeni bengqondo yabo.

¹⁸ Kumnyama engqondweni yabo, behlukene lokuphila kukaNkulunkulu ngenxa yokungazi kwabo, langenxa yobulukhuni benhliziyo yabo.

¹⁹ Kabaselasihawu, bazinikela emanyaleni, ukuze benze inhlobo zonke zokungcola.

²⁰ Kodwa kalimfundanga ngokunjalo uKristu.

²¹ Ngoba selimzwile lafundiswa ngaye, njengoba iqiniso likuJesu,

²² ukuba lilahle isimo esidala esokonakeleyo ngezinkanuko zenkohliso, esingesokuhamba kwenu kokuqala,

²³ lenziwe libe batsha emoyeni wengqondo zenu.

²⁴ Lambathe isimo esitsha esifuze uNkulunkulu esibonakala ekulungeni lasebungcweleni beqiniso.

²⁵ Ngakhoke lahlani amanga, likhulume iqiniso ilowo lalowo lomakhelwane wakhe, ngoba siyizitho zomzimba munye.

²⁶ Thukuthelani lingoni; ilanga kalingatshoni lisathukuthela;

²⁷ lingamniki uSathane ithuba.

²⁸ Olisela kangabe eseba, kodwa kakhuthale asebenze kuhle ngezandla zakhe, ukuze abe lamandla okunika labo abaswelayo.

²⁹ Kakungaphumi emlonyeni wenu lalinye ilizwi elibi, kodwa kakube ngelilungele ukwakha njengokufaneleyo ngalesosikhathi, ukuze libe yisibusiso kulabo abezwayo.

³⁰ Lingamdabukisi uMoya oNgcwele kaNkulunkulu elabekwa uphawu ngaye kuze kube lusuku lokuhlengwa.

³¹ Yonke inzondo, lentukuthelo, lolaka, lomsindo, lokunyeya, kanye lakho konke okubi, kakususwe phakathi kwenu.

³² Libe mnene omunye komunye, lihawukelane, lithethelelane, njengalokhu uNkulunkulu wasithethelela ngoKristu.