Abase-Efesu 3 - iBhayibhili Elingcwele 1978

UPawuli umiselwe ukwambula imfihlakalo kaKristu

¹ Ngenxa yalokhu mina Pawuli ngiyisibotshwa sikaKristu Jesu ngenxa yenu lina abezizwe,

² uba kambe selizwile ngomsebenzi womusa kaNkulunkulu engiwuphiweyo ngenxa yenu

³ ukuthi ngaziswa imfihlakalo ngesambulelo, njengalokhu sengake ngaloba ngokufitshane.

⁴ Nxa libala lokhu, lingabona ukwazi kwami ngemfihlakalo kaKristu,

⁵ imfihlakalo abangayaziswanga abantu ezizukulwaneni ezinye, njengalokhu isiyambuliwe khathesi kubaphostoli bakhe abangcwele labaprofethi ngoMoya,

⁶ ukuthi abezizwe bayizindlalifa kanye lathi, lokuthi bangumzimba munye kanye lathi, bangabahlanganyeli besithembiso kuKristu Jesu ngevangeli.

⁷ Mina ngenziwa isikhonzi salo ivangeli ngokwesipho somusa kaNkulunkulu engiwuphiwe ngokusebenza kwamandla akhe.

⁸ Mina engimncinyane kulabo bonke abangcwele ngawuphiwa lowomusa wokutshumayela kwabezizwe ivangeli lenotho kaKristu engelakulinganiswa,

⁹ lokubakhanyisela bonke abantu ukuthi liyini icebo lemfihlakalo ebifihliwe kuNkulunkulu owadala izinto zonke kusukela ekudatshulweni kwesikhathi,

¹⁰ ukuze ngebandla imibuso lamandla asezulwini yaziswe konke ukuhlakanipha kukaNkulunkulu.

¹¹ Lokhu kwakusiya ngecebo elingelakuphela alenza ngoKristu Jesu iNkosi yethu,

¹² esilesibindi ngaye ukungena kuNkulunkulu ngokukholwa kuye.

¹³ Ngakhoke ngiyalicela ukuba lingalahli ithemba ngenxa yezinhlupheko zami ngenxa yenu; ziludumo lwenu.

UPawuli ukhulekela ibandla ukuba likhule ekwazini uthando lukaNkulunkulu

¹⁴ Ngenxa yalokhu ngiguqa ngamadolo kuYise,

¹⁵ okubizwa ngebizo lakhe lonke usendo olusezulwini lolusemhlabeni,

¹⁶ ukuba ngokwenotho yobukhosi bakhe liqiniswe ngamandla ngoMoya wakhe enhliziyweni;

¹⁷ uKristu ahlale enhliziyweni zenu ngokukholwa. Lokhu selilempande, lesisekelo othandweni,

¹⁸ kalibe lamandla okuqedisisa kanye labo bonke abangcwele ububanzi, lobude, lokudepha, lokutshona

¹⁹ kothando lukaKristu, lokulwazi lanxa lusedlula ukwazi konke, ukuze ligcwaliswe ngakho konke ukugcwala kukaNkulunkulu.

²⁰ Ngakhoke yena olamandla okwenza okukhulu kakhulu ukwedlula konke esikucelayo lesikunakanayo ngamandla akhe asebenza kithi,

²¹ kakube kuye udumo ebandleni lakuKristu Jesu ezizukulwaneni zonke kuze kube nini lanini. Ameni.